ໃນຕອນເຊົ້າຂອງວັນທີ 11 ເມສາ 2024 ຄະນະຊາວໜຸ່ມໜ່ວຍຮາກຖານ ຄະນະໂຄສະນາອົບຮົມແຂວງ ແລະ ຄະນະຈັດຕັ້ງແຂວງ ໄດ້ຈັດຕັ້ງພິທີປາຖະກະຖາມູນເຊື້ອວັນສ້າງ ຄະນະຊາວໜຸ່ມປະຊາຊົນ ປະຕິວັດລາວ ຄົບຮອບ 69 ປີ ທີ່ຫ້ອງປະຊຸມຄະນະຈັດຕັ້ງແຂວງ ໂດຍການເປັນປະທານ ຂອງສະຫາຍ ບຸນເສີນ ເຍືອນຂວັນພະຈັນ ເລຂາຄະນະຊາວໜຸ່ມໜ່ວຍຮາກຖານຄະນະໂຄສະນາອົບຮົມແຂວງ ມີສະຫາຍ ຈັນດີ ຈົ່ງເຢຍຖໍ ເລຂາຄະນະຊາວໜຸ່ມ ໜ່ວຍຮາກຖານຄະນະຈັດຕັ້ງແຂວງ, ມີຮອງເລຂາ, ຄະນະຊາວໜຸ່ມໜ່ວຍຮາກຖານ ພ້ອມດ້ວຍສະມາຊິກຊາວໜຸ່ມ 2 ອົງການເຂົ້າຮ່ວມຢ່າງພ້ອມພຽງ.
ເພື່ອຫວນຄືນມູນເຊື້ອແຫ່ງການຕໍ່ສູ້ຢ່າງພິລະອາດຫານ ໃນການຕໍ່ສູ້ປົດປ່ອຍປະເທດຊາດ ຂອງຊາວໜຸ່ມລາວແຕ່ລະຮຸ່ນ ພາຍໃຕ້ແສງສະຫວ່າງຂອງພັກກອມມູນິດອິນດູຈີນ ກໍ່ຄືການນໍາພາຂອງພັກປະຊາຊົນປະຕິວັດລາວ ທີ່ປິຊາສາມາດ, ສະຫຼາດສ່ອງໃສ ສາມາດນໍາພາຊາວໜຸ່ມເຮັດສໍາເລັດພາລະກິດປົດປ່ອຍຊາດ ສາຖາປະນາ ປະເທດສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975. ນອກນັ້ນປະທານກອງປະຊຸມຍັງຊີ້ໃຫ້ເຫັນແນວທາງການປ່ຽນແປງໃໝ່ຂອງພັກ ໂດຍສະເພາະແມ່ນການປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ນໍາພາປະເທດຊາດຫຼຸດພົ້ນອອກຈາກປະເທດດອຍພັດທະນາ ກ້າວສູ່ປະເທດສັງຄົມນິຍົມຢ່າງໜັກແໜ້ນນັ້ນ ແມ່ນຮຽກຮ້ອງໃຫ້ຊາວໜຸ່ມປະຊາຊົນປະຕິວັດລາວ ຕ້ອງຖືເອົາ 4 ຄຸນລັກສະນະຂອງຊາວໜຸ່ມລາວຍຸກໃໝ່ເປັນແນວທາງປະຕິບັດເຊັ່ນ: ຊາວໜຸ່ມລາວຕ້ອງມີນໍ້າໃຈຮັກຊາດອັນດູດດຶມ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ປະຊາຊົນບັນດາເຜົ່າ; ມີຄວາມສາມັກຄີແໜ້ນແຟນ, ຊ່ວຍເຫຼືອສັງຄົມ, ຊ່ວຍເຫຼືອເຊິ່ງກັນ ແລະ ກັນ; ມີຄວາມດຸໝັ່ນ ອົດທົນ ຫ້າວຫັນ ຟົດຟື້ນ, ດຳລົງຊີວິດດ້ວຍຄວາມປອດໃສ ຂາວສະອາດ; ມີມານະຈິດຟົດຟື້ນປະຕິວັດ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ຝຶກຝົນຫຼໍ່ລອມຕົນເອງໃຫ້ມີຄວາມຮູ້ ແລະ ຄວາມສາມາດ, ເກັ່ງກ້າ, ອົງອາດປະຈັນບານ ກ້ຽມພ້ອມຮັບໃຊ້ປະເທດຊາດ ແລະ ຮັບໃຊ້ປະຊາຊົນຢ່າງສຸດໃຈ.