ເພື່ອປະຕິບັດກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ແລະ ຄໍາແນະນໍາ ຂອງຄະນະໂຄສະນາອົບຮົມສູນກາງພັກ ກ່ຽວກັບການນໍາໃຊ້ເອກະສານ ສະບັບເລກທີ 16/ຄອສພ ລົງວັນທີ 7 ກໍລະກົດ 2021. ໃນຕອນເຊົ້າ ຂອງວັນທີ 3 ເມສາ 2024 ຢູ່ທີ່ຫ້ອງປະຊຸມຂອງຄະນະໂຄສະນາອົບຮົມແຂວງ ໄດ້ຈັດພິທີອົບຮົມມະຫາຊົນກ້າວໜ້າຜູ້ທີ່ຈະຂະຫຍາຍເຂົ້າເປັນສະມາຊິກພັກ ຊຸດ 13 ຢ່າງເປັນທາງການ, ພາຍໃຕ້ການເປັນປະທານ ຂອງສະຫາຍ ສາຍດໍາ ໃຈຫຼ້າ ກໍາມະການໜ່ວຍພັກຮາກຖານ, ຮອງຫົວໜ້າຄະນະໂຄສະນາອົບຮົມແຂວງ, ມີສະຫາຍ ນາງ ສີປານຄໍາ ອິນໃຈ ຫົວໜ້າຂະແໜງອົບຮົມ, ມີຄະນະຮັບຜິດຊອບ ແລະ ບັນດາສະຫາຍມະຫາຊົນກ້າວໜ້າທີ່ມາຈາກໜ່ວຍພັກອ້ອມຂ້າງແຂວງ ເຂົ້າຮ່ວມຢ່າງພ້ອມພຽງ.
ໃນພິທີ ໄດ້ເຊື່ອມຊຶມເອກະສານ 13 ຄໍາຖາມ-13 ຄໍາຕອບ; ແນໃສ່ເຮັດໃຫ້ມະຫາຊົນກ້າວໜ້າຜູ້ທີ່ຈະຂະຫຍາຍເຂົ້າເປັນສະມາຊິກພັກ ມີຄວາມຮັບຮູ້, ເຂົ້າໃຈປະຫວັດຄວາມເປັນມາ, ອຸດົມການ ແລະ ທາດແທ້ຂອງພັກປະຊາຊົນປະຕິວັດລາວ; ເຂົ້າໃຈກ່ຽວກັບມາດຖານ, ເງື່ອນໄຂມະຫາຊົນທີ່ຈະຂະຫຍາຍເຂົ້າເປັນສະມາຊິກພັກ; ໜ້າທີ່, ພັນທະ ແລະ ຜົນປະໂຫຍດຂອງສະມາຊິກພັກ; ບັນດາຂໍ້ຫ້າມສໍາລັບສະມາຊິກພັກ ແລະ ເມື່ອໄດ້ເຂົ້າເປັນສະມາຊິກພັກ ຈະປົກປ້ອງບົດບາດ, ກຽດສັກສີຂອງພັກ ແນວໃດ?, ບົນພື້ນຖານຄວາມຮັບຮູ້, ຄວາມເຂົ້າໃຈ ສາມາດເຮັດໃຫ້ມະຫາຊົນຜູ້ທີ່ຈະຂະຫຍາຍເຂົ້າພັກ ເອົາໃຈໃສ່ຄົ້ນຄວ້າຮໍ່າຮຽນ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ມີມາດຖານເງື່ອນໄຂຄົບຖ້ວນ ແລະ ມີຄວາມຕື່ນຕົວສະໝັກເຂົ້າເປັນສະມາຊິກພັກປະຊາຊົນປະຕິວັດລາວ. ນອກນັ້ນ ສະຫາຍ ສາຍດໍາ ໃຈຫຼ້າ ຮອງຫົວໜ້າຄະນະໂຄສະນາອົບຮົມແຂວງ ກໍໄດ້ເນັ້ນໜັກໃຫ້ມະຫາຊົນກ້າວໜ້ານໍາເອົາບົດຮຽນທີ່ໄດ້ອົບຮົມ ໄປຄົ້ນຄວ້າ, ເຊື່ອມຊຶມ, ກໍາ ແໜ້ນ ພ້ອມທັງຝຶກຝົນຫຼໍ່ຫຼອມຕົນເອງ ໃຫ້ກາຍເປັນມະຫາຊົນກ້າວໜ້າທີ່ເປັນແບບຢ່າງທີ່ດີ ໃນການເຄື່ອນໄຫວປະຕິບັດໜ້າທີ່ການເມືອງຂອງຕົນ ແລະ ສາມາດຂະຫຍາຍເຂົ້າເປັນສະມາຊິກພັກໄດ້ໃນຕໍ່ໜ້າ.