ຄະນະໂຄສະນາອົບຮົມແຂວງ ປາຖະກະຖາ ວັນສຳຄັນ ຂອງຊາດ ຂອງພັກ.

ຕອນເຊົ້າວັນທີ 17 ກັນຍາ ນີ້ ທີ່ຫ້ອງປະຊຸມຂອງຄະນະໂຄສະນາອົບຮົມແຂວງ ໄດ້ມີພິທີປາຖະກະຖາ ວັນສຳຄັນ ຂອງຊາດ ຂອງພັກ ໃຫ້ກຽດ ປາຖະກະຖາ ໂດຍ ທ່ານ ນາງ ມະນີຈັນ ວິໄລຈິດ ກຳມະການປະຈຳພັກແຂວງ, ຫົວຫນ້າຄະນະໂຄສະນາອົບຮົມແຂວງ,  ມີຮອງຫົວຫນ້າຄະນະໂຄສະນາອົບຮົມແຂວງ, ບັນດາຫົວຫນ້າ, ຮອງຫົວຫນ້າຂະແຫນງ ຕະຫລອດຮອດ ພະນັກງານ-ລັດຖະກອນ ພາຍໃນຄະນະໂຄສະນາອົບຮົມແຂວງ ເຂົ້າຮ່ວມ.

ການປາຖະກະຖາ ເພື່ອຈັດຕັ້ງປະຕິບັດ ກ່ຽວກັບການເຜີຍແຜ່ ແລະ ຜັນຂະຫຍາຍ ບັນດາເນື້ອໃນ ເອກະສານ ວັນສຳຄັນຕ່າງໆ ຂອງຊາດ ຂອງພັກ ໃຫ້ປະກົດຜົນເປັນຈິງ ທັງແນໃສ່ເຮັດໃຫ້ ພະນັກງານ-ລັດຖະກອນ ພາຍໃນຄະນະໂຄສະນາອົບຮົມ ຮັບຮູ້, ເຂົ້າໃຈ ເນື້ອໃນ, ຄວາມຫມາຍ, ຄວາມສຳຄັນ ຂອງວັນດັ່ງກ່າວ ແລະ ນຳເອົາບົດຮຽນ, ຜົນສຳເລັດ ມາເປັນບ່ອນອີງໃນການສືບຕໍ່ ເຄື່ອນໄຫວ ຈັດຕັ້ງປະຕິບັດ ເຂົ້າໃນວຽກງານຕົນເອງຮັບຜິດຊອບໃຫ້ບັນລຸຕາມທິດທາງແຜນການທີ່ກຳນົດໄວ້. ເນື້ອໃນເອກະສານ ທີ່ນຳມາເຜີຍແຜ່ ປະກອບມີ: ວັນຢຶດອຳນາດ 23 ສິງຫາ 1945 ຄົບຮອບ 80 ປີ ແລະ 23 ສິງຫາ 1975 ຄົບຮອບ 50 ປີ, ວັນປະກາດເອກະລາດ 12 ຕຸລາ ຄົບຮອບ 80 ປີ ແລະ ວັນສ້າງຕັ້ງ ສະຫະພັນນັກຮົບເກົ່າ ແຫ່ງຊາດລາວ 9 ກັນຍາ ຄົບຮອບ 23 ປີ. ໃນນີ້ ໄດ້ຍົກໃຫ້ເຫັນເຖິງ ປະຫວັດ, ຄວາມເປັນມາ ຂອງການຢຶດອຳນາດ, ການສືບຕໍ່ເສີມຂະຫຍາຍ ມູນເຊື້ອເຂົ້າໃນການພັດທະນາປະເທດຊາດ, ບັນດາປັດໃຈສຳຄັນ ທີ່ສ້າງເງື່ອນໄຂ ໃຫ້ແກ່ການປະກາດເອກະລາດ ແລະ ການເສີມຂະຫຍາຍມູນເຊື້ອຂອງວັນດັ່ງກ່າວ, ສະພາບແວດລ້ອມ ພາຍໃນ, ພາຍນອກ, ຄວາມສຳຄັນ ແລະ ຄວາມຈຳເປັນຂອງການ ສ້າງຕັ້ງສະຫະພັນນັກຮົບເກົ່າແຫ່ງຊາດລາວ, ຜົນງານ, ໄຊຊະນະ ແລະ ການເຕີບໃຫຍ່ຂະຫຍາຍຕົວຂອງສະຫະພັນນັກຮົບເກົ່າແຫ່ງຊາດລາວ ໃນຕະຫລອດໄລຍະ 23 ປີຜ່ານມາ. ນອກນັ້ນ ຍັງໄດ້ມີການຜ່ານບາງເອກະສານສຳຄັນຈຳນວນຫນຶ່ງ ໂດຍສະເພາະແມ່ນ ຂໍ້ຕົກລົງ ຂອງຄະນະໂຄສະນາອົບຮົມແຂວງ ກ່ຽວກັບການແຕ່ງຕັ້ງ ນັກໂຄສະນາ-ປາຖະກະຖາ ດ້ວຍປາກເປົ່າ ພາຍໃນ ຄະນະໂຄສະນາອົບຮົມແຂວງ, ແຈ້ງການ ກ່ຽວກັບການເຕືອນໄພ ມິດສາຊີບ ແລະ ພຶດຕິກຳ ທີ່ເປັນການຫ້າມ ການນຳໃຊ້ ແລະ ຈຳຫນ່າຍເລກຫມາຍໂທລະສັບ ແລະ ແຈ້ງການ ກ່ຽວກັບການນຳໃຊ້ ສະໂມສອນແຂວງ ແລະ ຫ້ອງປະຊຸມຂອງຫ້ອງວ່າການແຂວງ.