ອຸດົມໄຊ ໂຮມຊຸມນຸມ ສະເຫຼີມສະຫຼອງ ວັນສ້າງຕັ້ງພັກ ຄົບຮອບ 70 ປີ
ພິທີໂຮມຊຸມນຸມ ສະເຫຼີມສະຫຼອງ ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 70 ປີ (22 ມີນາ 1955-22 ມີນາ 2025) ຈັດຂຶ້ນໃນວັນທີ 22 ມີນາ 2025 ທີ່ສະໂມສອນແຂວງອຸດົມໄຊ. ເປັນກຽດເຂົ້າຮ່ວມໃນພິທີໂຮມຊຸມນຸມ ອັນມີຄວາມໝາຍ, ຄວາມສໍາຄັນໃນຄັ້ງນີ້ໂດຍ ສະຫາຍ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງອຸດົມໄຊ, ມີບັນດາ ສະຫາຍໃນຄະນະປະຈຳພັກແຂວງ, ກຳມະການພັກແຂວງ, ພະແນກການ, ສອງກອງບັນຊາການ, ອະດີດການນໍາຂອງແຂວງ-ເມືອງ, ອົງການຈັດຕັ້ງສັງຄົມ, ຕາງໜ້າຊັ້ນຄົນ, ນັກຮຽນຮູ້ບັນຍາຊົນເຂົ້າຮ່ວມ.
ພິທີໂຮມຊຸມນຸມ ສະເຫຼີມສະຫຼອງ ວັນສ້າງຕັ້ງພັກ ຄົບຮອບ 70 ປີ ແມ່ນໄດ້ຮັບຊົມວິດີໂອສາລະຄະດີ 54 ປີ ແຫ່ງການເຕີບໃຫຍ່ຂະຫຍາຍຕົວຂອງອົງຄະນະພັກ ແຂວງອຸດົມໄຊ, ຊົມການສະແດງສິລະປະວັນນະຄະດີ 5 ລາຍການ ຫລັງຈາກນັ້ນ ຜູ້ເຂົ້າຮ່ວມ ໄດ້ຮັບຊົມ-ຮັບຟັງການກ່າວສູນທອນພົດຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ພັກປະຊາຊົນປະຕິວັດລາວ ຜ່ານທາງລະບົບອອນລາຍພ້ອມກັບບັນດາແຂວງໃນທົ່ວປະເທດ. ສະຫາຍເລຂາທິການໃຫຍ່ ໄດ້ຍົກໃຫ້ເຫັນມູນເຊື້ອແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງພັກປະຊາຊົນປະຕິວັດລາວ ຕະຫຼອດໄລຍະ 70 ປີ, ພັກປະຊາຊົນປະຕິວັດລາວ ກຳເນີດມາຈາກ ພັກກອມມູນິດອິນດູຈີນ, ພາຍໃຕ້ການນຳພາຂອງພັກກອມມູນິດອິນດູຈີນ, ການປະຕິວັດ ຂອງປະເທດເຮົາກໍໄດ້ເຕີບໃຫຍ່ຂຶ້ນເລື້ອຍໆ. ໃນປີ 1934 ກອງປະຊຸມໃຫຍ່ ພັກກອມມູນິດອີນດູຈີນ ໄດ້ຕົກລົງສ້າງຕັ້ງຄະນະບໍລິຫານງານພັກກອມມູນິດອິນດູຈີນ ປະຈຳພັກແຄວ້ນລາວ ຊຸດທຳອິດ ໃສ່ຊື່ວ່າ: “ຄະນະພັກແຄວ້ນລາວ” ຂຶ້ນ ເພື່ອນໍາພາ-ຊີ້ນໍາການປະຕິວັດໃນລາວ. ພາຍໃຕ້ການນໍາພາ ຂອງພັກກອມມູນິດອິນດູຈີນ ກໍຄື ຄະນະພັກແຄວ້ນລາວ ໄດ້ຍູ້ແຮງວຽກງານປຸກລະດົມຂົນຂວາຍມະຫາຊົນ ຢູ່ເຂດຊົນນະບົດ ແລະ ບໍລິເວນຊົນເຜົ່າ, ຖືຊາວໄຮ່ນາ ເປັນກຳລັງພື້ນຖານ ຂອງການປະຕິວັດ ເຮັດໃຫ້ຂະບວນການຕໍ່ສູ້ລະເບີດຂຶ້ນແຕ່ຕ່ຳຫາສູງໃນທົ່ວປະເທດ ດ້ວຍຫຼາຍຮູບຫຼາຍສີ ເປັນສາເຫດພາໃຫ້ມີການຢຶດອຳນາດ 23 ສິງຫາ 1945, ປະກາດເອກະລາດ ວັນທີ 12 ຕຸລາ 1945, ສ້າງຕັ້ງກອງທັບປະຊາຊົນລາວ ໃນວັນທີ 20 ມັງກອນ 1949 ແລະ ສ້າງຕັ້ງແນວລາວອິດສະຫລະຂຶ້ນ ໃນວັນທີ 13 ສິງຫາ 1950 ຊຶ່ງໄດ້ກາຍເປັນຄັນທຸງເຕົ້າໂຮມ, ດຶງດູດເອົາທຸກຊັ້ນຄົນເຂົ້າຮ່ວມການປະຕິວັດ ໄດ້ຢ່າງກວ້າງຂວາງ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ. ມາຮອດວັນທີ 22 ມີນາ 1955 ກອງປະຊຸມໃຫຍ່ສ້າງຕັ້ງພັກປະຊາຊົນ ປະຕິວັດລາວ ໄດ້ໄຂຂຶ້ນ; ປະທານ ໄກສອນ ພົມວິຫານ ກໍ່ໄດ້ຖືກເລືອກຕັ້ງໃຫ້ເປັນເລຂາທິການໃຫຍ່ ພ້ອມທັງໄດ້ວາງແຜນດຳເນີນງານຂອງພັກ 12 ຂໍ້ ຖືກຮັບຮອງໃນກອງປະຊຸມໃຫຍ່ ຄັ້ງທີ I ຂອງພັກ ເປັນໂຄງການເມືອງສະບັບທໍາອິດ ເພື່ອແນໃສ່ເຮັດລ້ອນໜ້າທີ່ຂອງພັກໃນໄລຍະໃໝ່, ກາຍເປັນແນວທາງກູ້ຊາດ ຕ້ານຈັກກະພັດຜູ້ຮຸກຮານ, ພັກໄດ້ຊັກຈູງປະຊາຊົນເຮົາ ດໍາເນີນການຕໍ່ສູ້ຍາດເອົາໄຊຊະນະນັບມື້ນັບໃຫຍ່ຫລວງ, ສາມາດເຕົົ້າໂຮມຄວາມສາມັກຄີທົ່ວປວງຊົນ ສູ້ຊົນເຮັດສຳເລັດພາລະກິດປົດປ່ອຍຊາດ ເຮັດໃຫ້ປະເທດລາວເປັນປະເທດສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນະຖາວອນ. ປະຈຸບັນ ພັກເຮົາໄດ້ສືບຕໍ່ປະຕິບັດ 2 ໜ້າທີ່ຍຸດທະສາດ ຄື ປົກປັກຮັກສາແລະສ້າງສາພັດທະນາປະເທດ ສປປ ລາວ ໃຫ້ນັບມື້ເຕີບໃຫຍ່ຂະຫຍາຍຕົວຮຸ່ງເຮືອງສີວິໄລຂຶ້ນໄປເລື້ອຍໆ.
ໂອກາດດັ່ງກ່າວ ສະຫາຍ ບຸນຄົງ ຫຼ້າຈຽມພອນ ເລຂາຄະນະບໍລິຫານງານພັກແຂວງ ໄດ້ຂຶ້ນຜ່ານຜົນງານການນຳພາຂອງອົງຄະນະພັກແຂວງ ອຸດົມໄຊ ເຊິ່ງສະຫາຍໄດ້ຍົກໃຫ້ເຫັນວ່າ ອົງຄະນະພັກແຂວງອຸດົມໄຊໄດ້ກຳເນີດເກີດຂຶ້ນແລະ ເຕີບໃຫຍ່ຂະຫຍາຍຕົວຈາກການເສຍສະຫຼະຊີວິດ, ເລືອດເນື້ອ ເພື່ອແລກເອົາຜືນແຜ່ນດິນອັນຫວງແຫນຂອງຕົນໃນຂະບວນການຕໍ່ສູ້ຕ້ານກັບຈັກະພັດຜູ້ຮຸກຮານຢ່າງດຸເດືອນຂ້ຽວຂາດສຸດແສນສາຫັດຂອງນັກຮົບປະຕິວັດ ແລະປະຊາຊົນບັນດາເຜົ່າຊາວແຂວງອຸດົມໄຊຜູ້ຮັກຊາດ, ຮັກຜືນແຜ່ນດິນ, ຮັກບ້ານເກີດເມືອງນອນຂອງຕົນ, ມູນເຊື້ອການປະຕິວັດທີ່ອົງອາດກ້າຫານ, ເດັດດ່ຽວໜຽວແໜ້ນ, ມີຂະບວນການຕໍ່ສູ້ເພື່ອປົດປ່ອຍຊາດ ພາຍໄຕ້ການນຳພາຂອງພັກຄອມມູຍນິດອິນດູຈີນ ຕໍ່ມາກໍ່ໄດ້ກາຍເປັນເຂດທີ່ໝັ້ນອັນແຂງແກ່ນຂອງການປະຕິວັດລາວ ແລະ ໄດ້ຮັບການປົດປ່ອຍ ສ້າງຕັ້ງເປັນແຂວງໃນວັນທີ 15 ກໍລະກົດ 1962. ພາຍຫຼັງສ້າງຕັ້ງແຂວງອຸດົມໄຊ ສູນກາງພັກໄດ້ບົ່ງຕົວແຕ່ງຕັ້ງຄະນະພັກຊຸດທຳອິດຂື້ນ, ຕະຫຼອດໄລຍະຜ່ານມາ ຮອດປະຈຸບັນ ອົງຄະນະພັກແຂວງອຸດົມໄຊໄຕ້ການນຳພາຂອງ 9 ສະຫາຍເລຂາພັກແຂວງ ໃນແຕ່ລະໄລຍະ ຄະນະບໍລິຫານງານພັກແຂວງໄດ້ວາງແນວທາງ ແລະ ວາງຈຸດສຸມຂອງຕົນຢ່າງພາວະວິໄລ ແລະນຳພາປະຕິບັດສອງໜ້າທີ່ຍຸດທະສາດ ແລະ ພັດທະນາແຂວງໃນສະພາບແວດລ້ອມທີ່ລະອິດລະອ້ຽວ ແລະ ມີຄວາມຮັບຜິດຊອບສູງ ອັນໄດ້ເຮັດໃຫ້ແຂວງອຸດົມໄຊມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງແກ້ໄຂນັບມື້ນັບດີຂື້ນເປັນກ້າວໆ.