ຄະນະໂຄສະນາອົບຮົມແຂວງອຸດົມໄຊ ເຄື່ອນໄຫວຊຸກຍູ້ວຽກງານວິຊາສະເພາະຮອບດ້ານຢູ່ເມືອງຫຼາ

ໃນວັນທີ 17 ທັນວາ 2024 ຄະນະໂຄສະນາອົບຮົມແຂວງ ເຄື່ອນໄຫວຊຸກຍູ້ວຽກງານວິຊາສະເພາະຮອບດ້ານຢູ່ເມືອງຫຼາ ນໍາພາທິມງານໂດຍ ທ່ານ ນາງ ມະນີຈັນ ວິໄລຈິດ ກໍາມະການພັກແຂວງ, ຮອງຫົວໜ້າຄະນະໂຄສະນາອົບຮົມແຂວງ ໄດ້ເຂົ້າພົບ ທ່ານ ນາງ ໄລວອນ ຈັນທະລາ ຮອງເລຂາພັກເມືອງ,  ຜູ້ຊີ້ນໍາວຽກງານການເມືອງ-ແນວຄິດ, ວຽກງານພັກ-ພະນັກງານ ເພື່ອແຈ້ງຈຸດປະສົງໃນການລົງຊຸກຍູ້ວຽກງານຮອບດ້ານໃຫ້ທ່ານຮອງເລຂາພັກເມືອງຮັບຊາບ; ກ່ອນອືນທ່ານກໍ່ໄດ້ຍ້ອງຍໍຊົມເຊີຍຄະນະພັກ, ຄະນະໂຄສະນາອົບຮົມແຂວງ ທີ່ເປັນຫວງເປັນໄຍຕໍ່ວຽກງານໂຄສະນາອົບຮົມເມືອງ ແລະ ພ້ອມທັງເນັ້ນໜັກບາງວຽກງານທີ່ຄະນະໂຄສະນາອົບຮົມເມືອງ ທີ່ຈັດຕັ້ງປະຕິບັດຜ່ານມາຍັງບໍ່ທັນບັນລຸຕາມແຜນການທີ່ວາງໄວ້ໂດຍສະເພາະແມ່ນ ວຽກງານເກັບກໍາສະພາບແນວຄິດ-ຫາງສຽງສັງຄົມ ແລະ ວຽກງານວິຊາສະເພາະຈໍານວນໜຶ່ງ. ພ້ອມນັ້ນ, ໄດ້ເຂົ້າພົບປະແລກປ່ຽນບົດຮຽນນໍາພະນັກງານຫັຼກແຫ່ຼງຂອງຄະນະໂຄສະນາອົບຮົມເມືອງ ເຊິ່ງໄດ້ຮັບການລາຍງານ ຂອງທ່ານ ສຸລິກາ ຄູນແສງທິບ ຮັກສາການຫົວໜ້າຄະນະໂຄສະນາອົບຮົມເມືອງຫຼາ ເຊິ່ງໄດ້ລາຍງານການຈັດຕັ້ງປະຕິບັດວຽກງານຮອບດ້ານໃນໄລຍະໜຶ່ງປີຜ່ານມາ ໄດ້ຍົກໃຫ້ເຫັນດ້ານດີຜົນງານ, ດ້ານຄົງຄ້າງ ແລະ ວິທີສື່ບຕໍ່ແກ້ໄຂໃນຕໍ່ໜ້າ ກອງປະຊຸມໄດ້ມີຄໍາຄິດ, ຄໍາເຫັນແລກປ່ຽນບົດຮຽນ ໃນການຈັດຕັ້ງປະຕິບັດບາງວຽກງານໂຄສະນາອົບຮົມ ເຊິ່ງເຫັນວ່າຂອດປະສານງານລະຫວ່າງແຂວງ-ເມືອງ ຍັງເຮັດບໍ່ທັນໄດ້ດີ ໂດຍສະເພາະແມ່ນການລາຍງານການໂຄສະນາ-ປາຖະກະຖາວັນສໍາຄັນຂອງຊາດ, ຂອງພັກ, ຂອງທ່ານຜູ້ນໍາ, ວຽກງານໂຄສະນາຜ່ານສື່ ແລະ ວຽກງານປະຫວັດສາດ; ວຽກງານເຊື່ອມຊຶມເອກະສານມະຕິ, ຄໍາສັ່ງຂອງສູນກາງ, ຂອງແຂວງ; ວຽກງານເກັບກໍາສະພາບແນວຄິດ-ຫາງສຽງສັງຄົມ ພ້ອມທັງສະເໜີວິທີການປະສານງານ ລະຫວ່າງແຂວງ-ເມືອງ ເພື່ອເຮັດໃຫ້ຂອດການຈັດຕັ້ງປະຕິບັດວຽກງານວິຊາສະເພາະສະດວກຂຶ້ນ.