ເຊື່ອມຊຶມເອກະສານການເມືອງ-ແນວຄິດ ຕິດພັນກັບການທາບທາມບຸກຄະລາກອນ ກອງປະຊຸມໃຫຍ່ ອົງຄະນະພັກເມືອງຮຸນ ຄັ້ງທີ XIII

ກອງປະຊຸມເຊື່ອມຊຶມເອກະສານການເມືອງ-ແນວຄິດ ຕິດພັນກັບການທາບທາມບຸກຄະລາກອນ ກອງປະຊຸມໃຫຍ່ ອົງຄະນະເມືອງຮຸນ ຄັ້ງທີ XIII, ຮອບທີ 1 ໄດ້ຈັດຂຶ້ນໃນຕອນເຊົ້າຂອງວັນທີ 17 ທັນວາ 2024ໂດຍໄດ້ຈັດເປັນສອງຈຸດຄື: ຈຸດທີ 1 ຢູ່ສະໂມສອນເມືອງ ໂດຍການເປັນປະທານ ຂອງສະຫາຍ ຄໍາພຽງ ຢາຈົງວາ ຮອງເລຂາພັກແຂວງ, ຜູ້ຊີ້ນໍາວຽກງານການເມືອງ-ແນວຄິດ, ວຽກງານພັກ-ພະນັກງານ ເປັນກຽດເຂົ້າຮ່ວມມີ ສະຫາຍ ນາງ ຄໍາໝັ້ນ ແກ້ວບຸນຫວນ ເລຂາພັກເມືອງ, ເຈົ້າເມືອງ ເມືອງຮຸນ; ຈຸດທີ່ 2 ຢູ່ສະໂມສອນໂຮງຮຽນມັດທະຍົມສົມບູນເມືອງຮຸນ ໂດຍການເປັນປະທານ ຂອງສະຫາຍ ນາງ ມະນີຈັນ ວິໄລຈິດ ກໍາມະການພັກແຂວງ, ຮອງຫົວໜ້າຄະນະໂຄສະນາອົບຮົມແຂວງ, ເປັນກຽດເຂົ້າຮ່ວມມີສະຫາຍ ໄລພອນ ຈິດຕະວົງ ຮອງເລຂາພັກເມືອງ, ປະທານກວດກາພັກ-ລັດເມືອງຮຸນ ພ້ອມດ້ວຍບັນດາສະຫາຍຄະນະບໍລິຫານພັກເມືອງ, ບັນດາຮາກຖານພັກອ້ອມຂ້າງເມືອງ, ສອງກອງບັນຊາການ ປກຊ-ປກສ, ຄະນະຮັບຜິດຊອບກອງປະຊຸມຂັ້ນແຂວງ-ເມືອງ, ຄະນະພັກບ້ານ, ນາຍບ້ານ ແລະ ພະນັກງານຫຼັກແຫຼ່ງອ້ອມຂ້າງເຂົ້າຮ່ວມ.

ກອງປະຊຸມໄດ້ຮັບຟັງການລາຍງານສະພາບການກະກຽມດໍາເນີນກອງປະຊຸມອົງຄະນະພັກເມືອງ, ໄດ້ເຜີຍແຜ່ເຊື່ອມຊຶມເອກະສານ 4 ບົດ ເພື່ອເຮັດສະມາຊິກພັກໃຫ້ມີຄວາມຮັບຮູ້, ເຂົ້າໃຈ ແລະ ເອກະພາບຕໍ່ເນື້ອໃນກ່ຽວກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ, ເພື່ອຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າຂອງພັກ, ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ, ເດັດດ່ຽວແກ້ໄຂປະກົດການຫຍໍ້ທໍ້ໃນຖັນແຖວພະນັກງານ, ສະມາຊິກພັກ ແລະ ແນະນໍາເອກະສານ 3 ວັນປະຫວັດສາດ;  ຈາກນັ້ນໃນຕອນບ່າຍຂອງວັນດຽວກັນ ໄດ້ສືບຕໍ່ດໍາເນີນການຜ່ານມາດຖານ-ເງື່ອນໄຂຜູ້ລົງສະໝັກເລືອກຕັ້ງຄະນະບໍລິຫານງານພັກເມືອງຊຸດໃໝ່ ແລະ ດຳເນີນການປ່ອນບັດຄັດເລືອກເອົາບຸກຄະລາກອນຮອບ 1 ຕາມມາດຖານເງື່ອນໄຂ ແລະ ລະບຽບຂອງພັກປະຊາຊົນປະຕິວັດລາວ ສະໄໝທີ XI.