ໜ່ວຍຊາວໜຸ່ມຮາກຖານຄະນະໂຄສະນາອົບຮົມແຂວງ ຈັດພິທີປະກາດຮັບຮອງຂໍ້ແຂ່ງຂັນ 4 ບຸກ ປະຈໍາປີ 2024
ໜ່ວຍຊາວໜຸ່ມຮາກຖານຄະນະໂຄສະນາອົບຮົມແຂວງ ຈັດພິທີປະກາດຮັບຮອງຂໍ້ແຂ່ງຂັນ 4 ບຸກ ປະຈໍາປີ 2024 ໃນຕອນເຊົ້າຂອງວັນທີ 27 ທັນວາ 2024 ທີຫ້ອງປະຊຸມຂອງຄະນະໂຄສະນາອົບຮົມແຂວງອຸດົມໄຊ. ໂດຍການເປັນປະທານຂອງ ສະຫາຍ ບຸນເສີນ ເຍືອນຂວັນພະຈັນ ເລຂາຄະນະໜ່ວຍຊາວໜຸ່ມຮາກຖານຄະນະໂຄສະນາອົບຮົມແຂວງ, ໃຫ້ກຽດເຂົ້າຮ່ວມໂດຍ ສະຫາຍ ນາງ ມະນີຈັນ ວິໄລຈິດ ກໍາມະການພັກແຂວງ, ເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ, ມີສະຫາຍ ຄໍາຈັນ ວ່າບົວແສງ ກໍາມະການສູນຊາວໜຸ່ມປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ ມີບັນດາສະຫາຍເລຂາ, ຮອງລາຂາ, ຄະນະໜ່ວຍອ້ອມຂ້າງ ແລະ ສະມາຊິກຊາວໜຸ່ມເຂົ້າຮ່ວມ.
ກອງປະຊຸມແມ່ນໄດ້ຮັບຟັງບົດສະຫຼຸບການປະເມີນຂໍ້ແຂ່ງຂັນ 4 ບຸກປະຈໍາປີ 2024 ແລະ ແຜນການການຈັດຕັ້ງປະຕິບັດ ຂໍ້ແຂ່ງຂັນ ປະຈໍາປີ 2025. ເຊິ່ງໄລຍະຜ່ານມາຄະນະໜ່ວຍຊາວໜຸ່ມຮາກຖານຄະນະໂຄສະນາອົບຮົມແຂວງ ໄດ້ເປັນເຈົ້າການສຶກສາອົບຮົມການເມືອງ-ແນວຄິດ ໃຫ້ສະມາຊິກຊາວໜຸ່ມ ຕິດພັນກັບການນໍາເອົາເອກະສານ, ນິຕິກໍາທີ່ກ່ຽວຂ້ອງມາຈັດຕັ້ງເຊື່ອມຊຶມ; ບຸກດ້ານການຝຶກຝົນຫຼໍ່ຫຼອມ-ຮໍ່າຮຽນ ສະມາຊິກຊາວໜຸ່ມຄວາມຫ້າວຫັນຕໍ່ການພັດທະນາຕົນເອງ ດ້ວຍການຄົ້ນຄວ້າຮໍ່າຮຽນເອົາຂໍ້ມູນຂ່າວສານໃນດ້ານຕ່າງໆ ຈາກວາລະສານ, ຮຽນຈາກອິນເຕີເນັດ, ສື່ສັງຄົມອອນລາຍ, ຮຽນຈາກປະສົບການເຮັດວຽກຕົວຈິງ, ເພື່ອນຮ່ວມງານ; ບຸກດ້ານການຈັດຕັ້ງ ນໍາພາຮ່ວມຊີວິດການເມືອງພາຍໃນ ເພື່ອຕໍານິກໍ່ສ້າງຊ່ວຍເຫຼືອ ເຊິ່ງກັນ ແລະ ກັນເຮັດ ໃຫ້ສະມາຊິກໄດ້ຮັບຮູ້, ເຂົ້າໃຈ, ມີຄວາມເປັນເອກະພາບຕໍ່ແນວທາງແຜນນະໂຍບາຍຂອງພັກ-ລັດ ໃນແຕ່ລະໄລຍະ, ເປັນເຈົ້າການຈັດຕັ້ງປະຕິບັດວຽກງານຂະບວນການຕ່າງໆ ຢູ່ໃນກົມກອງ; ບຸກດ້ານວິຊາຊີບ ແລະ ສ້າງວຽກເຮັດງານທຳ: ສະມາຊິກມີຄວາມມັກ-ຮັກໃນອາຊີບຂອງຕົນ, ເປັນເຈົ້າການຝຶກຝົນຫຼໍ່ຫຼອມຕົນເອງໃນທຸກດ້ານໂດຍສະເພາະແມ່ນການຍົກລະດັບຄວາມຮູ້, ຄວາມສາມາດ, ຄວາມຮັບຜິດຊອບຕໍ່ໜ້າທີການເມືອງຂອງຕົນສູງຂຶ້ນ, ປະຕິບັດໜ້າທີ່ວຽກງານວິຊາສະເພາະມີຜົນສໍາເລັດ ແລະ ມີປະສິດຕິພາບສູງຂຶ້ນ ຄະນະຊາວໜຸ່ມໄດ້ເປັນເຈົ້າການປຸກລະດົມ, ຊຸກຍູ້ສະມາຊິກຊາວໜຸ່ມພາຍໃນໜ່ວຍຕັ້ງໜ້າສ້າງເສດຖະກິດຄອບຄົວ ຕາມເງື່ອນໄຂ, ຄວາມສາມາດຕົວຈິງ ບົນພື້ນຖານຖືກຕ້ອງ, ສອດຄ່ອງກັບລະບຽບກົດໝາຍ ເຮັດໃຫ້ຊີວິດການເປັນຢູ່ດີຂຶ້ນເທື່ອລະກ້າວ ເຊິ່ງມີ 3 ຄອບຄົວ ກາຍເປັນຕົວແບບໃນການສ້າງເສດຖະກິດຄອບຄົວນອກຈາກເງິນເດືອນ ໃຫ້ແກ່ສະມາຊິກຊາວໜຸ່ມພາຍໃນໜ່ວຍ.ຜ່ານການປະເມີນການຈັດຕັ້ງປະຕິບັດຂໍ້ແຂ່ງຂັນ 4 ບຸກປະຈໍາປີ 2024 ຂອງຄະນະໜ່ວຍຊາວໜຸ່ມຮາກຖານຄະນະໂຄສະນາອົບຮົມແຂວງ ໄດ້ 9,6 ທຽບໃຊ້ແຜນການ ເກີນຄາດໝາຍ 0,4%.