ເຊື່ອມຊຶມເອກະສານການເມືອງ-ແນວຄິດ ຕິດພັນກັບການທາບທາມບຸກຄະລາກອນ ກອງປະຊຸມໃຫຍ່ ອົງຄະນະພັກເມືອງຫຼາ ຄັ້ງທີ XII
ກອງປະຊຸມເຊື່ອມຊຶມເອກະສານການເມືອງ-ແນວຄິດ ຕິດພັນກັບການທາບທາມບຸກຄະລາກອນ ກອງປະຊຸມໃຫຍ່ ອົງຄະນະເມືອງຫຼາ ຄັ້ງທີ XII, ຮອບທີ 1 ໄດ້ຈັດຂຶ້ນໃນຕອນເຊົ້າຂອງວັນທີ 11 ທັນວາ 2024 ທີ່ສະໂມງສອນຂອງເມືອງ ໂດຍການເປັນປະທານ ຂອງສະຫາຍ ສຸຫວັດ ມະຫາວົງສະນັ່ນ ກໍາມະການປະຈໍາພັກແຂວງ, ຫົວໜ້າຄະນະຈັດຕັ້ງແຂວງ, ເປັນກຽດເຂົ້າຮ່ວມໂດຍ ສະຫາຍ ນາງ ມະນີຈັນ ວິໄລຈິດ ກໍາມະການພັກແຂວງ, ຮອງຫົວໜ້າຄະນະໂຄສະນາອົບຮົມແຂວງ, ມີສະຫາຍ ສົມພາວັນ ສຸດຈະລິດ ວ່າການເລຂາພັກເມືອງ, ເຈົ້າເມືອງ ເມືອງຫຼາ ພ້ອມດ້ວຍບັນດາສະຫາຍຄະນະບໍລິຫານພັກເມືອງ, ບັນດາຮາກຖານພັກອ້ອມຂ້າງເມືອງ, ສອງກອງບັນຊາການ ປກຊ-ປກສ, ຄະນະຮັບຜິດຊອບກອງປະຊຸມຂັ້ນແຂວງ-ເມືອງ, ຄະນະພັກບ້ານ, ນາຍບ້ານ ແລະ ພະນັກງານຫຼັກແຫຼ່ງອ້ອມຂ້າງເຂົ້າຮ່ວມ.
ກອງປະຊຸມໄດ້ຮັບຟັງການລາຍງານສະພາບການກະກຽມດໍາເນີນກອງປະຊຸມອົງຄະນະພັກເມືອງ, ໄດ້ເຜີຍແຜ່ເຊື່ອມຊຶມເອກະສານ 4 ບົດ ເພື່ອເຮັດສະມາຊິກພັກໃຫ້ມີຄວາມຮັບຮູ້, ເຂົ້າໃຈ ແລະ ເອກະພາບຕໍ່ເນື້ອໃນກ່ຽວກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ, ເພື່ອຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າຂອງພັກ, ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ, ເດັດດ່ຽວແກ້ໄຂປະກົດການຫຍໍ້ທໍ້ໃນຖັນແຖວພະນັກງານ, ສະມາຊິກພັກ ແລະ ແນະນໍາເອກະສານ 3 ວັນປະຫວັດສາດ; 9ຈາກນັ້ນ ໃນຕອນບ່າຍຂອງວັນດຽວກັນກໍໄດ້ສືບຕໍ່ດໍາເນີນການຜ່ານມາດຖານ-ເງື່ອນໄຂຜູ້ລົງສະໝັກເລືອກຕັ້ງຄະນະບໍລິຫານງານພັກເມືອງຊຸດໃໝ່ ແລະ ດຳເນີນການປ່ອນບັດຄັດເລືອກເອົາບຸກຄະລາກອນຮອບ 1 ຕາມມາດຖານເງື່ອນໄຂ ແລະ ລະບຽບຂອງພັກປະຊາຊົນປະຕິວັດລາວ ສະໄໝທີ XI.