ສະມາຊິກພັກ, ພະນັກງານຂົງເຂດເສດຖະກິດ, ລັດວິສາຫະກິດ ຮັບຟັງມູນເຊື້ອ ວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 70 ປີ
ໃນວັນທີ 14 ມີນາ 2025 ນີ້ ທີ່ຫ້ອງປະຊຸມ ພະແນກແຜນການ ແລະ ການລົງທຶນ, ຄະນະໂຄສະນາອົບຮົມ ແຂວງອຸດົມໄຊ ໄດ້ຈັດຕັ້ງ ປາຖະກະຖາ ວັນສ້າງຕັ້ງ ພັກປະຊາຊົນປະຕິວັດລາວ ຄົບຮອບ 70 ປີ (22 ມີນາ 1955 – 22 ມີນາ 2025) ເຂົ້າຮ່ວມເປັນກຽດມີ ສະຫາຍ ຄຳພຽງ ຢາຈົງວາ ອາດີດຮອງເລຂາພັກແຂວງ, ມີຫົວໜ້າຄະນະໂຄສະນາອົບຮົມແຂວງ, ຫົວໜ້າ-ຮອງຫົວໜ້າພະແນກການ ຂົງເຂດ ເສດຖະກິດ ພ້ອມດ້ວຍຄະນະພັກ, ຄະນະຫ້ອງການ ແລະ ພາກສ່ວນກ່ຽວຂ້ອງ ເຂົ້າຮັບຟັງ.
ພິທີ ສະຫາຍ ຄຳພຽງ ຢາຈົງວາ ອາດີດຮອງເລຂາພັກແຂວງອຸດົມໄຊ ໄດ້ຂຶ້ນບັນຍາຍເຖິງຄວາມສຳຄັນຂອງ ວັນສ້າງຕັ້ງພັກປະຊາຊົນປະຕິວັດລາວ, ທີ່ໄດ້ນຳພາປະຊາຊົນລາວຕໍ່ສູ້ຢ່າງບໍ່ຢຸດຢັ້ງ ເພື່ອປະຊາທິປະໄຕ ແລະ ຄວາມກ້າວໜ້າຂອງຊາດ. ສະຫາຍໄດ້ຍົກໃຫ້ເຫັນ ບົດຮຽນ, ຜົນສຳເລັດ ແລະ ສິ່ງທ້າທາຍຕ່າງໆທີ່ພັກຍາດມາໄດ້ ໃນໄລຍະ 70 ປີ, ພ້ອມທັງຊີ້ໃຫ້ເຫັນທິດທາງການພັດທະນາພັກໃນອະນາຄົດ. ນອກນີ້, ສະຫາຍຍັງໄດ້ເນັ້ນໃຫ້ພາກສ່ວນທີ່ກ່ຽວຂ້ອງສືບຕໍ່ປຸກລະດົມປະຊາຊົນພາຍໃນແຂວງອຸດົມໄຊ ໃຫ້ມີຄວາມສາມັກຄີ, ຕັ້ງໜ້າປະຕິບັດໜ້າທີ່ວຽກງານຕາມແນວທາງນະໂຍບາຍຂອງພັກ ແລະ ລັດຖະບານ, ສົ່ງເສີມການພັດທະນາ ເສດຖະກິດ-ສັງຄົມ ຢ່າງຍືນຍົງ. ທັງໝົດນີ້ໄດ້ສະແດງໃຫ້ເຫັນເຖິງຄວາມສາມັກຄີ, ຄວາມຕັ້ງໜ້າ, ແລະ ຄວາມຮັບຜິດຊອບຂອງ ພະນັກງານ, ລັດຖະກອນ ແລະ ປະຊາຊົນ ໃນການສືບທອດ ແລະ ຮັກສາມູນເຊື້ອອັນສະຫງ່າຂອງພັກປະຊາຊົນປະຕິວັດລາວ, ການນຳພາອັນສະຫຼາດສ່ອງໃສຂອງພັກ, ຄວາມຕັ້ງໃຈຕໍ່ການປະຕິບັດໜ້າທີ່ວຽກງານດ້ວຍຄວາມຮັບຜິດຊອບ ແລະ ຄວາມອົດທົນຢ່າງຕັ້ງໜ້າ, ເພື່ອສືບຕໍ່ສ້າງສາ ແລະ ພັດທະນາປະເທດຊາດ ຕາມແນວທາງສັງຄົມນິຍົມ.