ຕອນບ່າຍ ຂອງວັນທີ 9 ພຶດສະພາ 2024 ຄະນະໂຄສະນາອົບຮົມແຂວງ ເຄື່ອນໄຫວປາຖະກະຖາ ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນ ຊຽງຂວາງ (18 ພຶດສະພາ 1959 – 18 ພຶດສະພາ 2024) ຄົບຮອບ 65 ປີ ແລະ ວັນວິລະກໍາໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກຊາດ (24 ພຶດສະພາ 1960) ພ້ອມທັງ ໂຄສະນາເຄື່ອນທີ ຢູ່ໂຮງຮຽນມັດທະຍົມສົມບູນນາຄົກ ເມືອງງາ ໂດຍການເປັນປະທານຮ່ວມຂອງທ່ານ ນາງ ກອງມະນີ ພິມມະສອນ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມເມືອງງາ ແລະ ທ່ານ ຄອນພະຈິດ ທັນຍາສິດ ຫົວໜ້າຂະແໜງບໍລິຫານ ຄະນະໂຄສະນາອົບຮົມແຂວງ, ທ່ານ ບຸນພັນ ພັນນະໄຕ ຮອງອໍານວນການໂຮງຮຽນມັດທະຍົມສົມບຸນນາຄົກ, ມີພະນັກງານ, ສະມາຊິກພັກ, ຄູ – ອາຈານ ແລະ ນ້ອງນັກຮຽນເຂົ້າຮ່ວມ.
ໃນພິທີທ່ານ ນາງ ກອງມະນີ ພິມມະສອນ ໄດ້ເລົ່າມູນເຊື້ອສອງວັນປະຫວັດສາດ ໂດຍຍົກໃຫ້ຮູ້ເຖິງ ການນໍາພາອັນຖືກຕ້ອງອັນສະຫລາດສ່ອງໃສຂອງພັກປະຊາຊົນປະຕິວັດລາວ ແລະ ນັກຮົບກອງພັນທີ 2 ໄດ້ຮັບການສຶກສາອົບຮົມການເມືອງແນວຄິດເປັນຢ່າງດີ. ອັນໄດ້ເຮັດໃຫ້ທຸກຄົນມີຄວາມຈົ່ງຮັກພັກດີຕໍ່ພັກ, ຕໍ່ປະເທດຊາດ ແລະ ປະຊາ ຊົນ, ບໍ່ຫວັນໄຫວຄອນແຄນຕໍ່ອຸປະສັກຫຍຸ້ງຍາກ, ສິ່ງທົດສອບທ້າທາຍຫລາຍປະການ. ພາຍໃນມີຄວາມສາມັກຄີເປັນເອກະພາບ, ມີນ້ຳໃຈສູ້ຮົບເດັດດ່ຽວອາດຫານ, ປະຕິບັດກົດລະບຽບວິໃນ ແລະ ຄຳສັ່ງເຂັ້ມງວດ, ຮັກສາຄວາມລັບຢ່າງເດັດຂາດ, ຍາມໃດກໍໄດ້ເອົາໃຈໃສ່ເຮັດວຽກງານລົງກໍ່ສ້າງຮາກຖານການເມືອງ, ປຸກລະດົມຂົນຂວາຍ ປະຊາຊົນ ກໍໍ່ຄືຂົນຂວາຍກຳລັງຂອງຝ່າຍກົງກັນຂ້າມ. ສະນັ້ນ, ຈິ່ງໄດ້ຮັບການສະໜັບສະໜູນຊ່ວຍເຫລືອ ຈາກອຳນາດການປົກຄອງທ້ອງຖິ່ນ ແລະ ປະຊາຊົນ. ຈາກນັ້ນ, ທ່ານ ຄອນພະຈິດ ທັນຍາສິດ ກໍໄດ້ຍົກໃຫ້ຮູ້ເຖິງ ວັນວິລະກຳໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກຊາດ ຍ້ອນຄວາມປີຊາສາມາດ ຂອງທ່ານຜູ້ນໍາພັກ – ລັດ ຍ້ອນນ້ຳໃຈຮັກຊາດອັນແຮງກ້າຂອງບັນດາຜູ້ນໍາເຮົາທີ່ມີຄວາມກ້າຫານ, ຕັດສິນໃຈຕໍ່ສູ້ຍອມເສຍສະຫລະ ມີຄວາມປີຊາສາມາດຂົນຂວາຍ, ສຶກສາອົບຮົມສາລະວັດທະຫານໃຫ້ມີນ້ຳໃຈຮັກຊາດອັນດູດດື່ມ, ເບື່ອໜ່າຍຕໍ່ອຳນາດປົກຄອງຫຸ່ນປະຕິການ. ຍ້ອນສາລະວັດທະຫານມີຄວາມຈົ່ງຮັກພັກດີ, ຊື່ສັດຕໍ່ຜູ້ນຳ ແລະ ນໍາພາທາງຜູ້ນຳພັກ ແລະ ແນວລາວຮັກຊາດອອກຈາກຄຸກໂພນເຄັງ ໄດ້ຢ່າງປອດໄພ. ຕອນທ້າຍຍັງໄດ້ຈັດກິດຈະກໍາຖາມ – ຕອບເພື່ອເປັນການທົດສອບຄວາມຮັບຮູ້ ແລະ ຄວາມເຂົ້າໃນຂອງນ້ອງນັກຮຽນຕື່ມອີກ.
ຕອນຄືນຂອງວັນດຽວກັນຢູ່ບ້ານຫ້ວຍຮຸມ ເມືອງໄຊ ກອງໂຄສະນາເຄື່ອນທີ່ ກໍ່ໄດ້ເຄື່ອນໄຫວນໍາເອົາສາລະຄະດີວັນຜ່າວົງປິດລ້ອມທີ່ຫົງໄຫຫີນຊຽງຂວາງ ແລະ ສາລະຄະດີວິລະກໍາໂຕນຄຸກຂອງທ່ານຜູ້ນໍາພັກ ແລະ ແນວລາວຮັກຊາດ ແລະ ສາລະຄະດີອື້່ນໆຈໍານວນໜຶ່ງໃຫ້ປະຊາຊົນໄດ້ຮັບຊົມ. ຈຸດປະສົງໃນການລົງເຄື່ອນໄຫວເພື່ອຮັບປະກັນໃຫ້ແກ່ການຈັດຕັ້ງປະຕິບັດຄໍາສັງ ຂອງຄະນະເລຂາທິການສູນກາງພັກ ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ໂດຍສະເພາະແມ່ນວຽກງານຂະບວນການໃຫ້ເປັນຂະບວນການຟົດຟື້ນ, ກວ້າງຂວາງ, ຕໍ່ເນື້ອງ ແລະ ມີຫຼາຍຮູບຫຼາຍສີ ໂດຍຕິດພັນກັບການຊຸກຍູ້ການປະຕິບັດໜ້າທີ່ວຽກງານ ທີ່ໄດຮັບການມອບໝາຍຢູ່ແຕ່ລະຂະແໜງການ ແລະ ທ້ອງຖິ່ນໃຫ້ສໍາເລັດຜົນ.