ຕອນບ່າຍ ຂອງວັນທີ 8 ພຶດສະພາ 2024 ຄະນະໂຄສະນາອົບຮົມແຂວງ ເຄື່ອນໄຫວປາຖະກະຖາ ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນ ຊຽງຂວາງ (18.5.1959-18.5.2024) ຄົບຮອບ 65 ປີ ແລະ ວັນວິລະກໍາໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກຊາດ (24 . 5. 1960) ພ້ອມທັງ ໂຄສະນາເຄື່ອນທີ ຢູ່ໂຮງຮຽນມັດທະຍົມສົມບູນ ນາຮ້ວງ ໂດຍການເປັນປະທານຮ່ວມຂອງສະຫາຍ ສອນເພັດ ຄໍາມີໄຊ ຮອງຫົວໜ້າຄະນະໂຄສະນາອົບຮົມເມືອງໄຊ, ມີສະຫາຍ ຄໍາພູວັນ ແພງວິໄລຫົງ ຮອງເລຂາຄະນະພັກຮາກຖານ, ເລຂາໜ່ວຍພັກ, ຜູ້ອໍານວຍການໂຮງຮຽນມັດທະຍົມສົມບຸນນາຮ້ວງ ແລະ ສະຫາຍ ນາງ ສີປານຄໍາ ອິນໃຈ ຫົວໜ້າຂະແໜງອົບຮົມ ຄະນະໂຄສະນາອົບຮົມແຂວງ, ມີພະນັກງານ, ສະມາຊິກພັກ, ຄູ-ອາຈານ ແລະ ນ້ອງນັກຮຽນເຂົ້າຮ່ວມທັງໝົດ 65 ຄົນ, ຍິງ 30 ຄົນ.
ໃນພິທີສະຫາຍ ສອນເພັດ ຄໍາມີໄຊ ໄດ້ເລົ່າມູນເຊື້ອສອງວັນປະຫວັດສາດ ໂດຍຍົກໃຫ້ຮູ້ເຖິງ ຄວາມບໍລິສຸດພຸດຜ່ອງ, ຄວາມຈົງຮັກພັກດີ, ຄວາມສາມັກຄີເປັນຈິດ ຫນຶ່ງໃຈດຽວ, ຄວາມອົດທົນໜັ້ນໜຽວບໍ່ຄອນແຄນຕໍ່ການນາບຂູ່, ຫລອກລວງຂອງສັດຕູ. ນ້ຳໃຈ ສູ້ຮົບພິລະອາດຫານ ແລະ ມີໄຫວພິບຂອງ ກອງພັນທີ 2 ໄດ້ເປັນແວ່ນແຍງ, ເປັນການປຸກລະດົມ ອັນແຮງກ້າໃຫ້ແກ່ຂະບວນການປະຕິວັດ ເພື່ອຕີເອົາຊະນະກັບຈັກກະພັດອາເມລິກາ ແລະ ລູກແຫລ້ງ ຕີນມື. ພ້ອມດຽວກັນນັ້ນກໍ່ເຮັດໃຫ້ກຳລັງປະຕິວັດ, ໂດຍສະເພາະແມ່ນກຳລັງປະກອບອາວຸດປະຊາຊົນ ນັບມື້ເຕີບໃຫຍ່ຂະຫຍາຍຕົວ ແລະ ເຂັ້ມແຂງ. ພ້ອມດຽວກັນສະຫາຍ ນາງ ສີປານຄໍາ ອິນໃຈ ກໍໄດ້ຍົກໃຫ້ຮູ້ເຖິງ ວັນວິລະກຳໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກຊາດ ຍ້ອນການນຳພາອັນສະຫລາດສ່ອງໃສ ແລະ ປີຊາສາມາດຂອງປະທານ ໄກສອນ ພົມວະຫານ ຍ້ອນນ້ຳໃຈຮັກຊາດ ອັນແຮງກ້າຂອງບັນດາຜູ້ນຳເຮົາທີ່ມີຄວາມກ້າຫານ, ຕັດສິນໃຈຕໍ່ສູ້ຍອມເສຍສະຫລະ ມີຄວາມປີຊາສາມາດຂົນຂວາຍ, ສຶກສາອົບຮົມສາລະວັດທະຫານ, ເຮັດໃຫ້ສັດຕູກາຍເປັນ ມິດສະຫາຍຮ່ວມຕາຍນຳກັນ. ຕອນທ້າຍພິທີຍັງໄດ້ມີການຫີ້ນກິດຈະກໍາຖາມ-ຕອບເພື່ອເປັນການທົດສອບຄວາມຮັບຮູ້ ແລະ ຄວາມເຂົ້າໃນຂອງນ້ອງນັກຮຽນຢ່າງເປັນຂະບວນການຟົດຟື້ນ.
ຕອນຄໍາວັນດຽວກັນຢູ່ບ້ານຫ້ວຍຮຸມ ເມືອງໄຊ ກອງໂຄສະນາເຄື່ອນທີກໍ່ໄດ້ເຄື່ອນໄຫວນໍາເອົາສາລະຄະດີວັນຜ່າວົງປິດທີ່ຫົງໄຫຫີນຊຽງຂວາງ ແລະ ສາລະຄະດີວິລະກໍາໂຕນຄຸກຂອງທ່ານຜູ້ນໍາພັກ ແລະ ແນວລາວຮັກຊາດ ແລະສາລະຄະດີອື້່ນໆຈໍານວນໜຶ່ງສາຍໃຫ້ ອົງການປົກຄອງ, ເຖົ້າແກ່ແນວໂຮມ ປະຊາຊົນໄດ້ຮັບຊົມທັງໝົດ 220 ຄົນ, ຍິງ 85 ຄົນ ຈຸດປະສົງໃນການລົງເຄື່ອນໄຫວເພື່ອເປັນການສ້າງຂະບວນຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນຂອງພັກ ທີ່ຈະມາເຖິງໃນໝໍໆນີ້ ໃຫ້ເປັນຂະບວນການຟົດຟື້ນ.