ຄະນະໂຄສະນາອົບຮົມແຂວງ ລົງເຄື່ອນໄຫວຊຸກຍູ້ວຽກງານຮອບດ້ານຢູ່ເມືອງນາໝໍ້
……..ພູວັນ ອ່ອນພະຈັນ
ຕອນເຊົ້າຂອງວັນທີ 26 ທັນວາ 2024 ຄະນະໂຄສະນາອົບຮົມແຂວງ ລົງຊຸກຍູ້ວຽກງານວິຊາສະເພາະຮອບດ້ານຢູ່ເມືອງນາໝໍ້ ແຂວງອຸດົມໄຊ ໂດຍການນໍາພາຂອງທ່ານ ນາງ ມະນີຈັນ ວິໄລຈິດ ກໍາມະການພັກແຂວງ, ຮອງຫົວໜ້າຄະນະໂຄສະນາອົບຮົມແຂວງ.
ກ່ອນອື່ນໄດ້ກ່າວຈຸດປະສົ່ງໃນການເຄື່ອນໄຫວຊຸກຍູ້ວຽກງານຮອບດ້ານນໍາຄະນະໂຄສະນາອົບຮົມເມືອງ ໃຫ້ທ່ານ ໄກເພັດ ອິນພູວຽງ ວ່າການເລຂາພັກເມືອງ ເຈົ້າເມືອງ ເມືອງນາໝໍ້ຮັບຊາບ. ຈາກນັ້ນ, ທ່ານ ໄກເພັດ ອິນພູວຽງ ກໍ່ໄດ້ຍ້ອງຍໍຊົມເຊີຍຕໍ່ຄະນະໂຄສະນາອົບຮົມແຂວງ ທີ່ໄດ້ເອົາໃຈໃສ່ໃນການລົງມາຊຸກຍູ້ວຽກງານຮອບດ້ານຂອງຄະນະໂຄສະນາອົບຮົມເມືອງນາໝໍ້ ແລະ ເນັ້ນໜັກບາງບັນຫາທີ່ຄະນະໂຄສະນາອົບຮົມເມືອງ ເຄື່ອນໄຫວບໍ່ທັນໄດ້ດີເທົ່າທີ່ຄວນ ຕ້ອງສືບຕໍ່ປັບປຸງແກ້ໄຂໃນຕໍ່ໜ້າຕື່ມອີກ. ຈາກນັ້ນ, ທິມງານ ຄະນະໂຄສະນາອົບຮົມແຂວງ ກໍ່ໄດ້ເຮັດວຽກຮ່ວມນໍາຄະນະໂຄສະນາອົບຮົມເມືອງ ໂດຍເປັນກຽດຕ້ອນຮັບຂອງທ່ານ ຕຶງຊົງ ສີສະວົງ ກໍາມະການພັກເມືອງ ຫົວໜ້າຄະນະໂຄສະນາອົບຮົມເມືອງ, ມີຮອງຫົວໜ້າ, ຫົວໜ້າໜ່ວຍງານ, ພະນັກງານຫຼັກແຫ່ຼງພາຍໃນຄະນະໂຄສະນາອົບຮົມເມືອງເຂົ້າຮ່ວມ. ໃນພິທີໄດ້ຮັບຟັງການລາຍງານການເຄື່ອນໄຫວວຽກງານຮອບດ້ານໂດຍສະເພາະແມ່ນວຽກງານ ໜ່ວຍງານບໍລິຫານ ແລະ ສັງລວມ, ໜ່ວຍງານໂຄສະນາ ແລະ ໜ່ວຍງານອົບຮົມ ໃນການເຄື່ອນໄຫວວຽກງານການເມືອງ – ແນວຄິດ ແລະ ວຽກງານວິຊາສະເພາະຂອງຄະນະໂຄສະນາອົບຮົມເມືອງນາໝໍ້ ເຫັນວ່າມີຜົນສໍາເລັດຫຼາຍດ້ານ ພ້ອມທັງແລກປ່ຽນບົດຮຽນລະຫວ່າງແຂວງ ກັບ ເມືອງ ຢ່າງກົງໄປກົງມາ ແລະ ແນະນໍາດ້ານວິຊາການສືບຕໍ່ປັບປຸງບາງໜ້າວຽກທີ່ຍັງເຮັດບໍ່ທັນບັນລຸຕາມແຜນການທີ່ວາງໄວ້.
ຕ້ອນທ້າຍຂອງພິທີທ່ານ ນາງ ມະນີຈັນ ວິໄລຈິດ ກໍາມະການພັກແຂວງ ຮອງຫົວໜ້າຄະນະໂຄສະນາອົບຮົມແຂວງ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ໃນໄລຍະຜ່ານມາ ແລະ ຮຽກຮ້ອງມາຍັງຄະນະພັກ, ສະມາຊິກພັກ ແລະ ພະນັກງານຫຼັກແຫ່ຼງຈົ່ງສືບຕໍ່ປັບປຸງແບບແຜນວິທີເຮັດວຽກ, ແກ້ໄຂບັນດາວຽກງານທີ່ຍັງຄົງຄ້າງ ໂດຍສະເພາະແມ່ນວຽກຕິດຕາມເກັບກໍາສະພາບແນວຄິດຫາງສຽງ – ສັງຄົມ, ເພື່ອບໍ່ໃຫ້ມີຜົນສະທ້ອນຕໍໍ່ການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ການສະເຫຼີມສະຫຼອງ 3 ວັນປະຫວັດສາດໃນປີ 2025 ນີ້ ໃຫ້ມີຂະບວນການຟົດຟື້ນ.