ຕອນບ່າຍວັນທີ 24 ພະຈິກ 2025 ຄະນະໂຄສະນາອົບຮົມແຂວງອຸດົມໄຊ ນໍາໂດຍ ທ່ານ ລໍ ຂຸນລໍ ຮອງຫົວໜ້າຄະນະໂຄສະນາອົບຮົມແຂວງ ພ້ອມດ້ວຍຄະນະ ໄດ້ລົງ ຕິດຕາມ ຊຸກຍູ້ ວຽກງານຮອບດ້ານ ຮ່ວມກັບ ຄະນະໂຄສະນາອົບຮົມ ເມືອງໄຊ ໂດຍໃຫ້ການຕ້ອນຮັບຂອງ ທ່ານ ສົມຈັນ ມູນກະສິງ ກໍາມະການປະຈຳພັກເມືອງ, ຫົວໜ້າຄະນະໂຄສະນາອົບຮົມເມືອງ ພ້ອມດ້ວຍ ພະນັກງານ-ລັດຖະກອນ.
ທ່ານ ລໍ ຂຸນລໍ ຮອງຫົວໜ້າຄະນະໂຄສະນາອົບຮົມແຂວງ ກ່າວວ່າ: ການລົງເຄື່ອນໄຫວເຮັດວຽກ ເພື່ອການ ຕິດຕາມ ຊຸກຍູ້ ວຽກງານຮອບດ້ານ ຂອງ ຄະນະໂຄສະນາອົບຮົມ ເມືອງໄຊ ເປັນຕົ້ນແມ່ນ ການຈັດຕັ້ງປະຕິບັດວຽກງານວິຊາສະເພາະ ຕະຫຼອດໄລຍະຜ່ານມາ ຊອກໃຫ້ເຫັນບັນຫາຕ່າງທີ່ພົບພໍ້ ຄວາມຫຍຸງຍາກ ເພື່ອຊອກຫາວິທີການແກ້ໄຂ ແນໃສ່ເຮັດໃຫ້ການເຄື່ອນໄຫວວຽກງານ ຖືກຕ້ອງຕາມແນວທາງ ແລະ ມີຄວາມສະດວກ ສະບາຍ. ຈາກຈັ້ນ ທ່ານ ສົມຈັນ ມູນກະສິງ ກໍາມະການປະຈຳພັກເມືອງ, ຫົວໜ້າຄະນະໂຄສະນາອົບຮົມ ເມືອງໄຊ ໄດ້ລາຍງານການຈັດຕັ້ງປະຕິບັດວຽກງານຮອບດ້ານໃນໄລຍະໜຶ່ງປີຜ່ານມາ ດ້ານດີ-ຜົນງານ ແລະ ດ້ານອ່ອນ-ຂໍ້ຄົງຄ້າງ ທີ່ຈະໄດ້ແກ້ໃນຕໍ່ໜ້າ, ພ້ອມຂໍ້ສະເໜີດ້ານຕ່າງເປັນຕົ້ນດ້ານບຸນກຄະລາກອນ, ອຸປະກອນຮັບໃຊ້ຫ້ອງການ ແລະ ຮັບໃຊ້ວຽກງານສື່ມວນຊົນ. ຈາກນັ້ນ ໄດ້ແລກປ່ຽນບົດຮຽນ ເຊິ່ງກັນ ແລະ ກັນ ໃນການຈັດຕັ້ງປະຕິບັດວຽກງານຜ່ານມາ ໂດຍສະເພາະແມ່ນການລາຍງານການໂຄສະນາ-ປາຖະກະຖາ ວັນສໍາຄັນຂອງຊາດ, ຂອງພັກ, ຂອງທ່ານຜູ້ນໍາ, ວຽກງານຜ່ານສື່ ແລະ ວຽກງານປະຫວັດສາດ; ວຽກງານເຊື່ອມຊຶມເອກະສານ, ມະຕິ, ຄໍາສັ່ງຂອງສູນກາງ, ຂອງແຂວງ; ວຽກງານເກັບກໍາສະພາບແນວຄິດ ຫາງສຽງສັງຄົມ ແລະ ວິທີການຈັດຕັ້ງປະຕິບັດວຽກງານ ລະຫວ່າງ ແຂວງ ແລະ ເມືອງ ມາແລກປ່ຽນຮ່ວມກັນ ແນເຮັດໃຫ້ການຈັດຕັ້ງປະຕິບັດວຽກງານ ແລະ ການປະສານງານ ນັບມື້ສະດວກ ວອງໄວ ຂຶ້ນກວ່າເກົ່າ.
ພາບ-ຂ່າວ: ຄຳພັນ ແກ້ວມະນີ