ຕອນບ່າຍຂອງວັນທີ 22 ເມສາ 2024 ຄະນະທີມງານຄະນະຄົ້ນຄວ້າແນວຄິດ ໄກສອນ ພົມວິຫານ ໄດ້ມາເຄື່ອນໄຫວເຮັດວຽກຢູ່ແຂວງອຸດົມໄຊ ນໍາພາທີມງານ ໂດຍ ປທ. ນາງ ຄໍາຫຼ້າ ແກ້ວອຸ່ນຄໍາ ຄະນະພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ພ້ອມດ້ວຍຄະນະທີມງານ ພາຍຫຼັງມາເຖີງກໍ່ໄດ້ເຂົ້າພົບການນໍາຂອງແຂວງ ຢູ່ທີ່ຫ້ອງຮັບແຂກ ຫ້ອງວ່າການແຂວງໃຫ້ກຽດຕ້ອນຮັບ ຂອງທ່ານ ຄໍາພຽງ ຢາຈົງວາ ຮອງເລຂາພັກ ແຂວງ, ຜູ້ຊີ້ນໍາວຽກງານພັກ-ພະນັກງານ
ໃນການເຂົ້າພົບການນໍາແຂວງ ທ່ານ ປທ. ຄໍາຫຼ້າ ແກ້ວອຸ່ນຄໍາ ໄດ້ແຈ້ງຈຸດປະສົງໃນການມາເຄື່ອນໄຫວເຮັດວຽກຢູ່ ແຂວງອຸດົມໄຊ ແມ່ນເພື່ອຄົ້ນຄວ້າແນວຄິດໄກສອນພົມວິຫານ ໃນຫົວຂໍ້: ຊີວິດ ແລະ ພາລະກິດປະຕິວັດ ຂອງ ປະທານ ໄກສອນ ພົມວິຫານ; ກ່ຽວກັບການສ້າງຄວາມສາມັກຄີປອງດອງຊາດ; ເພື່ອເຮັດໃຫ້ປື້ມນິພົນແນວຄິດ ໄກສອນ ພົມວິຫານ ຮັບປະກັນໃຫ້ໄດ້ລັກສະນະວິທະຍາສາດ ແລະ ສອດຄ່ອງກັບຕົວຈິງການມາເຮັດວຽກໃນຄັ້ງນີ້ແມ່ນຈະໄດ້ລົງໄປເກັບກຳຂໍ້ມູນ ແລະສໍາພາດອາດິດການນໍາຂອງແຂວງ ອາດີດການນໍາຂັ້ນເມືອງ, ອາດິດ ເລຂາພັກບ້ານ, ອາດິດຫົວໜ້າຕາແສງ ຢູ່ເມືອງແບງ ແລະ ເມືອງຮຸນ ທີ່ໄດ້ເຂົ້າຮ່ວມເຮັດວຽກ ຮ່ວມປະທານໄກສອນ ພົມວິຫານ ໃນໄລຍະປີ 1975-1992 ຫຼັງຈາກນັ້ນທ່ານຄຳພຽງ ຢາຈົງວາ ຮອງເລຂາພັກແຂວງ ຜູ້ຊີ້ນໍາວຽກງານພັກ ພະນັກງານ ໄດ້ຍ້ອງຍໍຊົມເຊີຍຄະນະທີມງານທີ່ມີຄວາມຕັດສິນໃຈສູງເລືອກເອົາແຂວງອຸດົມໄຊເປັນແຂວງໃຫ້ຂໍ້ມູນການເຄື່ອນໄຫວ ຂອງປະທານ ໄກສອນ ພົມວິຫານ ແລະສະແດງຄວາມຂອບໃຈຢ່າງລົ້ນເຫຼືອພ້ອມທັງກ່າວຍີນດີ ແລະຈະອໍານວຍຄວາມສະດວກໃຫ້ທີມງານຈັດຕັ້ງປະຕິບັດວຽກງານໃຫ້ມີຜົນສຳເລັດຕາມຄາດໜາຍທີ່ວ່າງໄວ້.