ກອງໂຄສະນາເຄື່ອນທີ່ຄະນະໂຄສະນາອົບຮົມແຂວງອຸດົມໄຊ ສົມທົບກັບ ຄະນະໂຄສະນາອົບຮົມເມືອງໄຊ ລົງໂຄສະນາປາຖະກະຖາ ແລະ ໂຄສະນາເຄື່ອນທີ່ ຢູ່ບ້ານແຟນ ເມືອງໄຊ
ຕອນຄໍ່າ ຂອງວັນທີ 4 ມິຖຸນາ 2025 ກອງໂຄສະນາເຄື່ອນທີ່ຄະນະໂຄສະນາອົບຮົມແຂວງ, ຄະນະໂຄສະນາອົບຮົມເມືອງໄຊ ລົງໂຄສະນາປາຖະກະຖາ ແລະ ໂຄສະນາເຄື່ອນທີ່ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ນໍາພາທິມງານໂດຍທ່ານ ພູວັນ ອ່ອນພະຈັນ ຫົວໜ້າຂະແໜງໂຄສະນາ, ມີທ່ານ ນາງ ໄພສອນ ສອນມະນີ ເລຂາພັກບ້ານ, ນາຍບ້ານ, ຄະນະພັກບ້ານ ປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ.
ໃນການລົງໂຄສະນາໃນຄັ້ງນີ້ ທ່ານ ພູວັນ ອ່ອນພະຈັນ ໄດ້ຍົກໃຫ້ຮູ້ເຖິງຂະບວນວິວັດແຫ່ງການກໍາເນີດ ຂອງພັກປະຊາຊົນລາວ. ມາຮອດວັນທີ 22 ມີນາ 1955 ກອງປະຊຸມໃຫຍ່ສ້າງຕັ້ງພັກປະຊາຊົນ ປະຕິວັດລາວ ຈິ່ງໄດ້ໄຂຂຶ້ນ ຢູ່ທີ່ບ້ານນາແມວ, ເມືອງວຽງໄຊ, ແຂວງຫົວພັນ ໂດຍເອີ້ນຊື່ວ່າ: “ພັກປະຊາຊົນລາວ” ປະທານ ໄກສອນ ພົມວິຫານ ໄດ້ຖືກເລືອກຕັ້ງເປັນເລຂາຄະນະຊີ້ນຳສູນກາງ (ເລຂາທິການໃຫຍ່) ໄດ້ວາງແຜນດຳເນີນງານຂອງພັກ 12 ຂໍ້ ຖືກຮັບຮອງໃນກອງປະຊຸມໃຫຍ່ຄັ້ງທີ I ຂອງພັກ ເພື່ອແນໃສ່ເຮັດລ້ອນໜ້າທີ່ຂອງພັກໃນໄລຍະໃໝ່, ກາຍເປັນແນວ ທາງກູ້ຊາດ ຕ້ານຈັກກະພັດຜູ້ຮຸກຮານ, ພັກໄດ້ນໍາພາປະຊາຊົນບັນດາເຜົ່າ ດໍາເນີນການຕໍ່ສູ້ຍາດເອົາໄຊຊະນະນັບມື້ນັບໃຫຍ່ຫຼວງ, ສາມາດເຕົົ້າໂຮມຄວາມສາມັກຄີທົ່ວປວງຊົນ ເຮັດສຳເລັດພາລະກິດປົດປ່ອຍຊາດ ເຮັດໃຫ້ປະເທດລາວເປັນປະເທດສັນຕິພາບ, ເອກະລາດ, ປະຊາທິປະໄຕ ເອກະພາບ ແລະ ວັດທະນະຖາວອນ. ພັກເຮົານັບແຕ່ມື້ສ້າງຕັ້ງຂຶ້ນເວລາໃດກໍຢຶດໝັ້ນໃນທາດແທ້ ຖືປະຊາຊົນເປັນກົກ ແລະ ມີຄວາມຈົງຮັກພັກດີຕໍ່ຜົນປະໂຫຍດລວມຂອງຊາດ, ຂອງປະຊາຊົນ; ຖືການສະໜັບສະໜູນຂອງປະຊາຊົນ ເປັນສິ່ງສໍາຄັນຕັດສິນບົດບາດນໍາພາ ແລະ ການກໍາອໍານາດຂອງພັກ; ເປັນເຈົ້າການປັບປຸງແບບແຜນວິທີນໍາພາຂອງພັກ, ເຄື່ອນໄຫວຕິດແທດກັບປະຊາຊົນ, ເຄົາລົບສິດເປັນເຈົ້າຂອງປະຊາຊົນ, ເຮັດທຸກສິ່ງທຸກຢ່າງ ເພື່ອຄວາມຮັ່ງມີຜາສຸກຂອງປະຊາຊົນ ແລະ ຄວາມມັ່ງຄັ່ງເຂັ້ມແຂງຂອງປະເທດຊາດ. ພ້ອມດຽວກັນຍັງໄດ້ຊົມສາລະຄະດີ 70 ປີ ການນໍາພາຂອງພັກປະຊາຊົນປະຕິວັດລາວ ແລະ ສາລະຄະດີ 54 ປີ ແຫ່ງການນໍາພາ-ຊີ້ນໍາ ຂອງອົງຄະນະພັກແຂວງອຸດົມໄຊ ພ້ອມທັງມີກິດຈະກໍາຖາມ-ຕອບ ຄວາມຮູ້ຮອບຕົວເພື່ອໃຫ້ປະຊາຊົນມີສ່ວນຮ່ວມຮັບຂອງລາງວັນ ຈາກຄະນະທິມງານດ້ວຍບັນຍາກາດຝົດຟື້ນ.