ປະຕິບັດຕາມແຜນດຳເນີນງານ ປະຈຳປີ 2024 , ດັ່ງນັ້ນ ໃນຕອນບ່າຍຂອງວັນທີ 28 ມິຖຸນາ 2024 ທີ່ຫ້ອງປະຊຸມຄະນະໂຄສະນາອົບຮົມແຂວງ ສະຫະພັນແມ່ຍິງໜ່ວຍ ຄະນະໂຄສະນາອົບຮົມແຂວງ ໄດ້ຈັດກອງປະຊຸມສະຫຼຸບຕີລາຄາຄືນການນຳພາ-ຊີ້ນຳຈັດຕັ້ງປະຕິບັດວຽກງານຮອບດ້ານ ແລະ ວຽກງານກວດກາ ໄລຍະ 6 ເດືອນຕົ້ນປີ 2024 ຂຶ້ນຢ່າງເປັນທາງການ. ໂດຍການເປັນປະທານ ຂອງສະຫາຍ ນາງ ກົງຈັນ ໄພມະນີ ຫົວໜ້າສະຫະພັນແມ່ຍິງໜ່ວຍ ຄະນະໂຄສະນາອົບຮົມແຂວງ, ໃຫ້ກຽດເຂົ້າຮ່ວມກອງປະຊຸມມີສະຫາຍ ສາຍດໍາ ໃຈຫຼ້າ ກໍາມະການຄະນະໜ່ວຍພັກຮາກຖານ, ຮອງຫົວໜ້າຄະນະໂຄສະນາອົບຮົມແຂວງ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ມີຮອງຫົວໜ້າສະຫະພັນແມ່ຍິງໜ່ວຍ ແລະ ສະມາຊິກສະຫະພັນແມ່ນຍິງເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ສະຫຼຸບການເຄື່ອນໄຫວວຽກງານຮອບດ້ານ ຂອງສະຫະພັນແມ່ຍິງໜ່ວຍ ຄະນະໂຄສະນາອົບຮົມແຂວງ ໄລຍະ 6 ເດືອນຕົ້ນປີ ແລະ ວາງທິດທາງແຜນການ, ແຜນງານ ໄລຍະ 6 ເດືອນທ້າຍປີ 2024. ເຊິ່ງໃນໄລຍະ 6 ເດືອນຜ່ານມາ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ II ຂອງສະຫະພັນແມ່ຍິງໜ່ວຍໃຫ້ປະກົດຜົນເປັນຈິງນັ້ນ ທາງໜ່ວຍໄດ້ສ້າງແຜນການ, ແຜນດຳເນີນງານ ແລະ ອອກຂໍ້ຕົກລົງແບ່ງຄວາມຮັບຜິດຊອບພາຍໃນໜ່ວຍຢ່າງຈະແຈ້ງ, ພ້ອມທັງເອົາໃຈໃສ່ຕິດຕາມ, ກວດກາ, ຊຸກຍູ້, ສະຫຼຸບລາຍງານຂໍທິດຊີ້ນຳຈາກຂັ້ນເທິງເປັນປະຈຳ ແລະ ຈັດກອງສະຫຼຸບຖອດຖອນບົດຮຽນຕິດພັນກັບການຕຳນິກໍ່ສ້າງຊ່ວຍເຫຼືອເຊິ່ງກັນ ແລະ ກັນໃນແຕ່ລະໄລຍະ ເຮັດໃຫ້ທິດທາງແຜນການວຽກງານສະຫະພັນແມ່ຍິງໜ່ວຍ ໄລຍະ 6 ເດືອນຕົ້ນປີ 2024 ບັນລຸເຖິງ 96%, ຈັດກອງປະຊຸມປະເມີນຂໍ້ແຂ່ງຂັນ 3 ດີ ປະຈຳ 6 ເດືອນຕົ້ນປີ 2024 ໄດ້ 1 ຄັ້ງ, ມີຜູ້ເຂົ້າຮ່ວມ 6 ສະຫາຍ, ຜ່ານການປະເມີນສະມາຊິກແມ່ຍິງໜ່ວຍເປັນສະມາຊິກແມ່ຍິງ 3 ດີ ກວມ 100%.
ຕອນທ້າຍກອງປະຊຸມ ສະຫາຍ ສາຍດໍາ ໃຈຫຼ້າ ກໍາມະການຄະນະໜ່ວຍພັກຮາກຖານ, ຮອງຫົວໜ້າຄະນະໂຄສະນາອົບຮົມແຂວງ ກໍໄດ້ມີຄຳເຫັນໂອ້ລົມ ເຊິ່ງສະຫາຍໄດ້ຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານການເຄື່ອນໄຫວຂອງສະຫະພັນແມ່ຍິງໜ່ວຍໃນໄລຍະ 6 ເດືອນຕົ້ນປີ 2024 ຜ່ານມາ ພ້ອມທັງ ມີທິດຊີ້ນຳໃນການເຄື່ອນໄຫວຈັດຕັ້ງປະຕິບັດວຽກງານໃນຕໍ່ໜ້າ ແລະ ມີຄວາມເຊື່ອໝັ້ນຕໍ່ສະມາຊິກສະຫະພັນແມ່ຍິງພາຍໃນໜ່ວຍທີ່ຈະສືບຕໍ່ຈັດຕັ້ງປະຕິບັດຕາມແຜນການ, ແຜນງານ 6 ເດືອນທ້າຍປີ 2024 ໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້.