ສະຫະພັນແມ່ຍິງ ຂົງເຂດພັກ-ພະນັກງານປາຖະກະຖາເລົ່າມູນເຊື້ອວັນສ້າງຕັ້ງແມ່ຍິງສາກົນ ຄົບຮອບ 112 ປີ

ລາຍລະອຽດ

ສ້າງຂື້ນເມື່ອ ວັນສຸກ, 04 ມີນາ 2022 08:49

ຂຽນໂດຍ ບຸນພອນ ແສງສຸລິນ

         ໃນວັນທີ 4 ມີນາ 2022  ສະຫະພັນແມ່ຍິງຂົງເຂດພັກ-ພະນັກງານ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງແມ່ຍິງສາກົນ  ວັນທີ 8 ມີນາ 1910-8 ມີນາ  2022 ຄົບຮອບ 112 ປີ ຢ່າງເປັນທາງການ ທີ່ຫ້ອງປະຊຸມພະແນກພາຍໃນແຂວງ. ໂດຍການເປັນປະທານ ຂອງທ່ານ ນາງ ແກ້ວໄຊ ມະນີວົງ  ຮອງຫົວໜ້າຄະນະໂຄສະນາອົບຮົມແຂວງ, ຄະນະບໍລິຫານງານສະຫະພັນແມ່ຍິງແຂວງ, ມີຄະນະພັກ, ແຂກເຊີນ ແລະ ບັນດາຫົວໜ້າສະຫະພັນແມ່ຍິງໜ່ວຍຄະນະໂຄສະນາອົບຮົມແຂວງ, ຄະນະຈັດຕັ້ງແຂວງ, ຄະນະກວດກາແຂວງ ແລະພະແນກພາຍໃນແຂວງ ພ້ອມດ້ວຍສະມາຊິກເຂົ້າຮ່ວມ 24 ສະຫາຍ.

        ໃນພິທີປາຖະກະຖາເລົ່າມູນເຊື້ອວັນສ້າງຕັ້ງແມ່ຍິງສາກົນໃນຄັ້ງນີ້ ໄດ້ຫວນຄືນປະຫວັດສາດຄວາມເປັນມາຂອງວັນແມ່ຍິງສາກົນ ເຊິ່ງວ່າແມ່ຍິງສາກົນໄດ້ກໍາເນີດໃນລະບອບທຶນນິຍົມ ບົນພື້ນຖານຄວາມທຸກຍາກຂອງຊາວຜູ້ອອກແຮງງານ ແລະ ຖືກກົດຂີ່ຂູດຮິດແຮງງານຢ່າງໜັກໜ່ວງໃນກຸ່ມແມ່ຍິງ-ເດັກນ້ອຍ,  ເຮັດວຽກຢ່າງໜັກ ແຕ່ໄດ້ຮັບຄ່າແຮງງານບໍ່ເໝາະສົມ. ເຊິ່ງວ່າວັນທີ 8 ມີນາ 1910 ແມ່ນເຫດການ-ການເມືອງ ທີ່ສໍາຄັນ, ເປັນຂີດໝາຍແຫ່ງໄຊຊະນະພື້ນຖານຂອງຂະບວນການແມ່ຍິງສາກົນ ໃນການທ້ວງໃຫ້ເອົາສິດຜົນປະໂຫຍດອັນເປັນທໍາ ໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະລຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທວງສິດສະເໝີພາບ ປະຊາທິປະໄຕ ຄືກັນກັບເພດຊາຍ; ສໍາລັບພັກປະຊາຊົນປະຕິວັດລາວ ແມ່ນ ໄດ້ມີແນວທາງນະໂຍບາຍຕໍ່ການພັດທະນາ, ປົກປ້ອງສິດຜົນປະໂຫຍດຂອງແມ່ຍິງ ແລະສົ່ງເສີມຄວາມສະເໝີພາບລະຫວ່າງຍິງ-ຊາຍ ເຊິ່ງໄດ້ກໍານົດໃນລັດຖະທໍາມະນູນ ແລະ ກົດໝາຍ. ນອກນັ້ນຍັງສ້າງຕັ້ງກອງທຶນເພື່ອຫຼຸດຜ່ອນຄວາມທຸກຍາກ, ກອງທຶນພັດທະນາແມ່ຍິງ, ກອງທຶນຊ່ວຍເຫຼືອ ເພື່ອສ້າງແມ່ຍິງຜູ້ທຸກຍາກໃນການພັດທະນາເສດຖະກິດ ແລະ ພັດທະນາຊີວິດການເປັນຢູ່ໃຫ້ດີຂຶ້ນ.

           ໂອກາດດັ່ງກ່າວ ທ່ານ ນາງ ແກ້ວໄຊ ມະນີວົງ ຮອງຫົວໜ້າຄະນະໂຄສະນາອົບຮົມແຂວງ, ຄະນະບໍລິຫານງານ ສະຫະພັນແມ່ຍິງແຂວງ ໄດ້ຮຽກຮ້ອງມາຍັງສະມາຊິກແມ່ຍິງ ຈົ່ງຕັ້ງໜ້າຄົ້ນຄ້ວາຮໍ່າຮຽນແນວທາງນະໂຍບາຍຂອງພັກ, ກົດໝາຍຂອງລັດ, ນິຕິກໍາຕ່າງໆ ເພື່ອພັດທະນາຊີວິດການເປັນຢູ່ຂອງແມ່ຍິງ  ພ້ອມທັງຍົກສູງຄຸນທາດການເມືອງ-ແນວຄິດ, ຄຸນສົມບັດສິນທໍາປະຕິວັດ ສືບຕໍ່ຈັດຕັ້ງປະຕິບັດຂໍ້ແຂ່ງຂັນ 3 ດີ ແລະ ຮັກສາຮີດຄອງປະເພນີມູນເຊື້ອອັນດີງາມຂອງແມ່ຍິງລາວ.

• < ຕໍ່ໄປ
• ຕໍ່ໄປ >