ຄະນະໂຄສະນາອົບຮົມແຂວງ ເປີດກອງປະຊຸມເຜີຍແຜ່ເອກະສານ ສຶກສາການເມືອງ-ແນວຄິດ ໃຫ້ແກ່ສະມາຊິກໃໝ່

ລາຍລະອຽດ

ສ້າງຂື້ນເມື່ອ ວັນອັງຄານ, 09 ມີນາ 2021 07:31

ຂຽນໂດຍ ບຸນພອນ

         ໃນຕອນເຊົ້າຂອງວັນທີ 26 ກຸມພາ 2021 ຜ່ານມາ ຄະນະໂຄສະນາອົບຮົມແຂວງ ໄດ້ເປີດກອງປະຊຸມເຜີຍແຜ່ເອກະສານສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກໃໝ່ອ້ອມຂ້າງແຂວງ ທີ່ສະໂມງສອນຂອງແຂວງຢ່າງເປັນທາງການ ໂດຍການເປັນປະທານ ຂອງສະຫາຍ ມໍຊົງ ກໍາມະການປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ. ມີຄະນະຮັບຜິດຊອບ, ວິທະຍາກອນ ແລະ ບັນດາສະມາຊິກພັກໃໝ່ທີ່ມາຈາກໜ່ວຍພັກຮາກຖານອ້ອມຂ້າງແຂວງ ເຂົ້າຮ່ວມທັງໝົດ 155 ສະຫາຍ, ຍິງ 60 ສະຫາຍ.

         ເອກະສານທີ່ນໍາມາເຜີຍແຜ່ເຊື່ອມຊຶມໃນຄັ້ງນີ້ປະກອບມີ 5 ບົດຄື: ຄວາມຮູ້ພື້ນຖານກ່ຽວກັບ ລັດທິມາກ-ເລນິນ; ວຽກງານກໍ່ສ້າງ ແລະ ປັບປຸງພັກ; ຄຸນທາດການເມືອງ ແລະ ຄຸນສົມບັດສິນທຳປະຕິວັດຂອງສະມາຊິກພັກ; ເຊີດຊູຄວາມເປັນແບບຢ່າງນຳໜ້າຂອງສະມາຊິກພັກ ແລະ ແກ້ໄຂພະຍາດອາດຍາສິດ, ສະກັດກັ້ນ ແລະ ຕ້ານການສໍ້ລາດບັງຫຼວງ. ບັນດາເອກະສານທີ່ນໍາມາເຜີຍແຜ່ເຊື່ອມຊຶມແມ່ນລ້ວນແຕ່ມີຄວາມໝາຍ, ຄວາມສໍາຄັນ ແນໃສ່ຍົກລະດັບຄວາມຮັບຮູ້-ເຂົ້າໃຈຢ່າງເລິກເຊິ່ງຕໍ່ກັບບົດບາດການນໍາພາຂອງພັກ, ສ້າງຄວາມເຊື່ອໝັ້ນຕໍ່ແນວທາງຂອງພັກ, ຄວາມເປັນແບບຢ່າງນໍາໜ້າຂອງສະມາຊິກພັກ ພ້ອມກັນຕ້ານ ແລະ ແກ້ໄຂບັນຫາສິ່ງຫຍໍ້ທໍ້ໃນຖັນແຖວພະນັກງານ-ສະມາຊິກພັກ ກໍາແໜ້ນທິດນໍາໃນການກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ເພື່ອເຮັດໃຫ້​ແນວ​ທາງ, ແຜນ​ນະ​ໂຍ​ບາຍ, ລະ​ບຽບ​ຂອງ​ພັກ, ກົດ​ໝາຍ ແລະ ລະ​ບຽບ​ການ​ຕ່າງໆ​ຂອງ​ລັດ​ໄດ້​ຮັບ​ການ​ຈັດ​ຕັ້ງ​ເຜີຍ​ແຜ່, ເຊື່ອມ​ຊຶມ ແລະ ຈັດ​ຕັ້ງ​ປະ​ປະ​ຕິ​ບັດ​ຢ່າງ​ທົ່ວ​ເຖິງ ແລະ ເປັນ​ເອ​ກະ​ພາບ​ໃນ​ຂອບ​ເຂດ​ທົ່ວ​ແຂວງ, ເປັນການ​ສຶກ​ສາ​ອົບ​ຮົມ​ການ​ເມືອງ-ແນວ​ຄິດ​ໃຫ້​ແກ່​ສະ​ມາ​ຊິກ​ພັກ​ໃໝ່​ຢູ່​ອ້ອມ​ຂ້າງ​ແຂວງ ແລະ ທັງເປັນການກໍ່ສ້າງ-ບໍາລຸງພະນັກງານ-ສະມາຊິກໃຫ້ໜັກແໜ້ນທາງຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມຮູ້ຄວາມສາມາດເຂົ້າໃນວຽກງານຕົວຈິງເຂົ້າໃນເງື່ອນໄຂໃໝ່ ແລະ ຍົກສູງໃຫ້ສະມາຊິກພັກເຊີດຊູສະຕິລະວັງຕົວ, ຕ້ານບັນດາຖອຍທໍານອງສົງຄາມຈິດທະສາດຂອງສັດ.

          ໂອກາດດັ່ງກ່າວ ສະຫາຍ ຄໍາພຽງ ຢາຈົງວາ ຮອງເລຂາພັກແຂວງ ໄດ້ໂອ້ລົມຕໍ່ສະມາຊິກພັກໃໝ່  ແລະ ໄດ້ຮຽກຮ້ອງມາຍັງພະນັກງານ-ສະມາຊິກພັກ ຕັ້ງໜ້າສຶກສາອົບຮົມລັດທິມາກ-ເລນິນ, ແນວທາງນະໂຍບາຍຂອງພັກ,  ລະບຽບກົດໝາຍຂອງລັດຢ່າງເປັນເຈົ້າການ. ໂດຍສະເພາະແມ່ນເຊ່ື່ອມຊຶມບັນດານິຕິກໍາຕ່າງໆຂອງພັກ-ລັດ, ຜັນຂະຫຍາຍແນວທາງນະໂຍບາຍຂອງພັກເປັນແຜນງານ, ໂຄງການລະອຽດເຂົ້າໃນໜ້າທີ່ວຽກງານໃນຄວາມຮັບຜິດຊອບຂອງຕົນ ນອກນັ້ນຍັງຕ້ອງຝຶກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ຄິດສົມບັດສິນທໍາປະຕິວັດ, ຄວາມຮູ້ຄວາມສາມາດ ເພື່ອກາຍເປັນກໍາລັງຂອງພັກໃນຕໍ່ໜ້າ.

• < ຕໍ່ໄປ