ກອງໂຄສະນາເຄື່ອນທີ່ຂອງຄະນະໂຄສະນາອົບຮົມແຂວງ ລົງໂຄສະນາເຄື່ອນໄຫວວຽກຢູ່ບ້ານມູນເມືອງ

ລາຍລະອຽດ

ສ້າງຂື້ນເມື່ອ ວັນສຸກ, 24 ມີນາ 2023 04:08

ຂຽນໂດຍ ພູວັນ ອ່ອນພະຈັນ

                   ວັນທີ 21 ມີນາ 2023 ຄະນະໂຄສະນາອົບຮົມແຂວງ ສົມທົບຄະນະໂຄສະນາອົບຮົມເມືອງໄຊ ລົງເຄື່ອນໄຫວໂຄສະນາເຄື່ອນທີ່ ຢູ່ບ້ານ ມູນເມືອງ, ເມືອງໄຊ ໂດຍການນໍາພາທິມງານ ຂອງທ່ານ ໄຊສົງຄາມ ທໍາປັນຍາ ຫົວໜ້າຂະແໜງໂຄສະນາ ເປັນກຽດເຂົ້າຮ່ວມຂອງຄະນະພັກເຂດ, ເລຂາພັກບ້ານ, ນາຍບ້ານ ແລະ ປະຊາຊົນພາຍໃນບ້ານເຂົ້າຮ່ວມ 180 ກວ່າຄົນ, ຍິງ 48 ກວ່າຄົນ.

          ໂອກາດດັ່ງກ່າວທ່ານ ໄຊສົງຄາມ ທໍາປັນຍາ ຫົວໜ້າຂະແໜງໂຄສະນາ ໄດ້ຂຶ້ນເລົ່າປະຫວັດມູນເຊື້ອວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 68 ປີ ແລະ ວັນນັກຮົບເສຍອົງຄະ, ເສຍສະຫຼະຊີວິດເພື່ອປະເທດຊາດ ຄົບຮອບ 77 ປີ ໂດຍໄດ້ຍົກໃຫ້ເຫັນປະຫວັດມູນເຊື້ອແຫ່ງການກໍາເນີດເຕີບໃຫຍ່ຂະຫຍາຍຕົວ ແລະ ທາດແທ້ຂອງພັກ, ຜົນງານແຫ່ງການນໍາພາ-ຊີ້ນໍາຂອງພັກທັງໄລຍະຕໍ່ສູ້ກູ້ຊາດ ແລະ ໄລຍະສ້າງສາປະເທດຊາດ, ການປະກອບສ່ວນສຳຄັນຂອງສະມາຊິກພັກ, ພະນັກງານນັກຮົບ ແລະ ປະຊາຊົນບັນດາເຜົ່າທີ່ໄດ້ເສຍສະຫຼະ ເພື່ອພາລະກິດປະຕິວັດຈົນສາມາດຍາດໄດ້ໄຊຊະນະເປັນກ້າວໆມາ. ພ້ອມນັ້ນຍັງໄດ້ນຳເອົາຮູບເງົາສາລະຄະດີວັນສ້າງຕັ້ງພັກ ແລະວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ແລະ ສາລະຄະດີຜົນຮ້າຍຂອງຢາເສບຕິດລົງສາຍໃຫ້ປະຊາຊົນໄດ້ຮັບຊົມ ເພື່ອໂຄສະນາສຶກສາອົບຮົມ ໃຫ້ປະຊາຊົນຮັບຮູ້ເຂົ້າໃຈເລິກເຊິ່ງຕໍ່ກັບບົດບາດສຳຄັນຂອງພັກໃນການນຳພາ ແລະ ໄພອັນຕະລາຍຢ່າງຮ້າຍແຮງຂອງຢາເສບຕິດ ປຸກລະດົມໃຫ້ຄະນະພັກ, ອົງການປົກຄອງ ແລະປະຊາຊົນພາຍໃນບ້ານຕ້ອງເປັນເຈົ້າການໃນຕ້ານ ແລະການສະກັດກັ້ນບັນຫາຢາເສບຕິດໃຫ້ໝົດໄປເທື່ອລະກ້າວ.

• < ຕໍ່ໄປ
• ຕໍ່ໄປ >