ຄະນະໂຄສະນາອົບຮົມແຂວງ ອຸດົມໄຊ

ລາຍລະອຽດ

ສ້າງຂື້ນເມື່ອ ວັນຈັນ, 15 ພຶດສະພາ 2023 02:28

ຂຽນໂດຍ ພູວັນ ອ່ອນພະຈັນ

                   ຕອນເຊົ້້າຂອງວັນທີ 4 ພຶດສະພາ 2023 ຄະນະໂຄສະນາອົບຮົມແຂວງ ສົມທົບກັບຄະນະໂຄສະນາອົບຮົມເມືອງໄຊ ລົງໂຄສະນາ-ປາຖະກະຖາວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົງໄຫຫີນຊຽງຂວາງ ຄົບຮອບ 64 ປີ, ວັນວິລະກໍາໂຕນຄຸກຢ່າງມະຫັດສະຈັນຂອງບັນດາທ່ານຜູ້ນໍາພັກ ແລະແນວລາວຮັກຊາດ ຄົບຮອບ 63 ປີ ຢູ່ໂຮງຮຽນ ມັດທະຍົມສົມບູນ ບ້ານກໍນ້ອຍ ເມືອງໄຊ ແຂວງອຸດົມໄຊ ເຊິ່ງມີຄະນະອໍານວຍການໂຮງຮຽນ, ຄູ-ອາຈານ ແລະ ນ້ອງນັກຮຽນເຂົ້າຮ່ວມ 215 ກ່ວາຄົນ, ຍິງ 115 ກ່ວາຄົນ.

       ເພື່ອເປັນການຫວນຄືນມູນເຊື້ອວິລະກຳອັນລໍ້າເລີດດັ່ງກ່າວ ທ່ານ ໄຊສົງຄາມ ທໍາປັນຍາ ຫົວໜ້າຂະແໜງ ໂຄສະນາໄດ້ຍົກໃຫ້ເຫັນສະພາບເຫດການມູນເຊື້ອ, ປະຫວັດສາດໃນການຜ່າວົງປິດລ້ອມຂອງກອງພັນທີ 2 ແລະ ວິລະກຳໂຕນຄຸກຢ່າງມະຫັດສະຈັນຂອງບັນດາທ່ານຜູ້ນໍາພັກ ແລະ ແນວລາວຮັກຊາດຄັ້ງນີ້ ເຊິ່ງເປັນເຫດການທີ່ມີຄວາມສ່ຽງເປັນສ່ຽງຕາຍທີ່ສຸດ, ແຕ່ຍ້ອນການນໍາພາອັນສະຫຼາດສ່ອງໃສຂອງພັກ ກໍຄືບັນດາພະນັກງານ, ນັກຮົບກອງພັນທີ 2 ທີ່ມີນໍ້າໃຈເດັດດ່ຽວອາດຫານ, ບໍ່ຍອມຈຳນົນ, ບໍ່ຫວັ່ນໄຫວຄອນແຄນຕໍ່ອຸປະສັກ, ສິ່ງທົດສອບທ້າທາຍຕ່າງໆ ຈຶ່ງສາມາດທັບມ້າງກົນອຸບາຍຂອງຈັກກະພັດ ແລະ ລູກແຫຼ້ງຕີນມືຂອງພວກເຂົາທີ່ຫວັງດັບມອດກຳລັງປະຕິວັດ ໂດຍສະເພາະກອງພັນທີ 2 ໃຫ້ພັງທະລາຍລົງສຸດທ້າຍສາມາດຜ່າວົງປິດລ້ອມທີ່ແໜ້ນໜາຂອງສັດຕູໄປສູ່ເຂດທີ່ໝັ້ນດ້ວຍຄວາມປອດໄພ ແລະ ຕໍ່ເຫດການໂຕນຄຸກຂອງຜູ້ນຳພັກ ແລະ ແນວລາວຮັກຊາດນັ້ນ ຍ້ອນມີນໍ້າໃຈຮັກຊາດອັນແຮງກ້າຂອງບັນດາຜູ້ນໍາເຮົາທີ່ມີຄວາມກ້າຫານ, ຕັດສິນໃຈຕໍ່ສູ້, ຍອມເສຍສະຫຼະຊີວິດເລືອດເນື້ອຂອງຕົນເພື່ອພາລະກິດປະຕິວັດ, ຍ້ອນຄວາມປີຊາສາມາດຂອງທ່ານ ໄກສອນ ພົມວິຫານ ແລະ ບັນດາທ່ານຜູ້ນຳແນວລາວຮັກຊາດ ທີ່ມີການຊີ້ນໍາອັນລະອຽດ, ສາມາດຂົນຂວາຍ, ສຶກສາອົບຮົມສາລະວັດທະຫານ, ເຮັດໃຫ້ສັດຕູກາຍເປັນມິດສະຫາຍຮ່ວມຕາຍນໍາກັນ, ມີນໍ້າໃຈຮັກຊາດອັນດູດດື່ມ, ເບື່ອໜ່າຍຕໍ່ອໍານາດການປົກຄອງຫຸ່ນປະຕິການ. ເຂົ້າເຈົ້າມີຄວາມຈົ່ງຮັກພັກດີ, ຊື່ສັດຕໍ່ຜູ້ນໍາສຸດຂີດກາຍເປັນຜູ້ໄຂປະຕູຄຸກແລ້ວປ້ອງກັນ ແລະ ພາບັນດາທ່ານຜູ້ນຳພັກ ແລະ ແນວລາວຮັກຊາດຍ່າງອອກຈາກຄຸກໄປຢ່າງປອດໄພ.

• < ຕໍ່ໄປ
• ຕໍ່ໄປ >