ກອງໂຄສະນາເຄື່ອນທີ່ ຄະນະໂຄສະນາອົບຮົມແຂວງລົງເຄື່ອນໄຫວສາຍມູນເຊື້ອວັນຜ່າວົງປິດລ້ອມກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ ຄົບຮອບ 60 ປີ

ສ້າງຂື້ນເມື່ອ ວັນອັງຄານ, 30 ກໍລະກົດ 2019 02:28

                           

        ໃນຕອນແລງຂອງວັນທີ 21 ມິຖຸນາ 2019 ຜ່ານມາກອງໂຄສະນາເຄື່ອນທີ່ ຄະນະໂຄສະນາອົບຮົມແຂວງ ໄດ້ສົມທົບກັບ ຄະນະໂຄສະນາອົບຮົມເມືອງໄຊ ລົງເຄື່ອນໄຫວ ສາຍມູນເຊື້ອວັນຜ່າວົງປິດລ້ອມກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ ຄົບຮອບ 60 ປີ ຢູ່ບ້ານ ຫ້ວຍຍໍາ ເມືອງໄຊ ແຂວງອຸດົມໄຊ ຢ່າງເປັນທາງການ. ພາຍໃຕ້ການເປັນປະທານ ຂອງ ສະຫາຍ ຄໍາຈັນ ວ່າບົວແສງ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ. ເຊິ່ງມີເລຂາພັກບ້ານ, ນາຍບ້ານ, ແນວໂຮມບ້ານ ແລະ ປະຊາຊົນບັນດາເຜົ່າເຂົ້້າຮ່ວມຮັບຟັງ-ຮັບຊົມທັງຫມົດ 163 ຄົນ, ຍິງ 92ຄົນ.

       ມູນເຊື້ອທີ່ນໍາໄປໂຄສະນາໃນຄັ້ງນີ້ແມ່ນ ວັນຜ່າວົງປິດລ້ອມກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ ຄົບຮອບ 60 ປີ ແລະ ຜົນຮ້າຍຂອງຢາເສບຕິດ. ເພື່ອແນໃສ່ການສຶກສາອົບຮົມການເມືອງ-ແນວຄິດໃຫ້ປະຊາຊົນບັນດາເຜົ່າ ໄດ້ຫວນຄືນເຖິງມູນເຊື້ອພິລະອາດຫານ  ຂອງກອງພັນທີ 2 ທີ່ຖືກທະຫານຝ່າຍວຽງຈັນປິດລ້ອມ ໂດຍສະເພາະແມ່ນການປິດລ້ອມໂດຍນໍາໃຊ້ກໍາລັງທະຫານ, ເສດຖະກິດ ແລະ ໃຊ້ທຸກວິທີທາງເພື່ອປາບປາມ, ສະກັດກັ້ນບີບບັງຄັບ ໃຫ້ປະຕິບັດຕາມຄວາມຕ້ອງການຂອງຝ່າຍວຽງຈັນ. ແຕ່ຍ້ອນການນໍາພາຂອງພັກທີ່ສະຫຼາດສ່ອງໃສ, ມູນເຊື້ອພິລະອາດຫານຕໍ່ສູ້ບໍ່ຍອມຈໍານົນ, ຄວາມເສຍສະຫຼະ, ຄວາມສາມັກຄີເປັນປຶກແຜ່ນຂອງພະນັກງານ-ນັກຮົບ ແລະ ປະຊາຊົນບັນດາເຜົ່າ. ສາມາດຜ່າວົງລ້ອມທີ່ແໜ້ນໜາຂອງສັດຕູໄປສູ່ເຂດທີ່ໝັ້ນໄດ້ຢ່າງປອດໄພ ແລະ ຈາກນອກນັ້ນຍັງໃຫ້ປະຊາຊົນຮັບຮູ້, ເຂົ້າໃຈຜົນຮ້າຍຂອງຢາເສບຕິດ ທີ່ພວມເປັນໄພຂົ່ມຄູ່ສັງຄົມໃນປັດຈຸບັນ, ທ່ວງດຶງການພັດທະນາຂອງປະເທດຊາດ, ສ້າງປະກົດການຫຍໍ້ທໍ້ ແລະ ບັນຫາຕ່າງໃນສັງຄົມ.

        ໃນຕອນທ້າຍ ສະຫາຍ ຄໍາຈັນ ວ່າບົວແສງ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ ຍັງໄດ້ໂອ້ ລົມ ແລະ ຮຽກຮ້ອງມາຍັງອົງການປົກຄອງບ້ານ, ປະຊາຊົນບັນດາເຜົ່າ ຈົ່ງຮັກສາມູນເຊື້ອອັນດີງາມຂອງຊາດ, ມູນເຊື້ອສາ ມັກຄີເປັນປຶກແຜ່ນ ແລະ ພ້ອມສະກັດກັ້ນບັນຫາຢາເສບຕິດ, ປະກົດການຫຍໍ້ທໍ້ຕ່າງໆ ໃນສັງຄົມໃຫ້ໝົດໄປເທື່ອລະກ້າວ. ພ້ອມທັງເພີ່ມພູນຜະລິດຜົນໃຫ້ເປັນສີນຄ້າ ຕາມທິດເພິ່ງຕົນ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.