ຄະນະໂຄສະນາອົບຮົມອຸດົມໄຊ ຈັດຕັ້ງພິທີປາຖະກະຖາມູນເຊື້ອ ວັນເກີດປະທານ ສຸພານຸວົງ ຄົບຮອບ 110 ປີ

                      

       ໃນຕອນເຊົ້າຂອງວັນທີ 10 ກໍລະກົດ 2019 ຄະນະໂຄສະນາອົບຮົມແຂວງໄດ້ຈັດຕັ້ງພິທີປາຖະກະຖາ ມູນເຊື້ອວັນເກີດ ປະທານ ສຸພານຸວົງ ຄົບຮອບ 110 ປີ (13/7/1909-13/7/2019) ຢ່າງເປັນທາງການ ທີ່ສະໂມສອນແຂວງອຸດົມໄຊ. ພາຍໃຕ້ການເປັນປະທານ ຂອງ ທ່ານ ນາງ ຈັນສະໝອນ ທິບພະຫົງ ກໍາມະການປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ.ໃຫ້ກຽດເຂົ້າຮ່ວມໂດຍ ທ່ານ ປະລິນຍາເອກ ຄໍາພັນ ເຜີຍຍະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງແຂວງອຸດົມໄຊ ມີກໍາມະການປະຈໍາພັກແຂວງ, ກໍາມະການພັກແຂວງ, ຄະນະພັກ-ຄະນະບັນຊາ ສອງກອງບັນຊາການ, ພະນັກງານຫຼັກແຫຼ່ງຈາກພະແນກການແລະ ພະນັກງານ-ລັດຖະກອນ ອ້ອມຂ້າງແຂວງເຂົ້າຮ່ວມທັງໝົດ 258 ສະຫາຍ.

         ພິທີປາຖະກະຖາ ມູນເຊື້ອວັນເກີດ ປະທານ ສຸພານຸວົງ ຄົບຮອບ 110 ປີໃນຄັ້ງນີ້ ແມ່ນເພື່ອລະນຶກເຖິງຄຸນງາມຄວາມດີ ຂອງປະທານ ສຸພານຸວົງ ເຊິ່ງທ່ານເປັນຜູ້ນໍາທີ່ດີເດັ່ນທີ່ມີຄວາມຈົງຮັກພັກດີຕໍ່ອຸດົມການຂອງພັກ ແລະ ຕະຫຼອດໄລຍະ 50 ປີ ທີ່ປະທານສຸພານຸວົງ ໄດ້ອຸທິດຕົນຕໍ່ການປະຕິວັດ ທ່ານແມ່ນປັນຍາຊົນຜູ້ຍິ່ງໃຫຍ່ ເປັນເຊື້ອເຈົ້າຜູ້ໜຶ່ງທີ່ມີນໍ້າໃຈຮັກຊາດອັນດູດດື່ມ, ມີຈິດໃຈຕໍ່ສູ້ພິລະອາດການກ້າແກ່ນ, ມີທັດທັດສະນະຫຼັກໝັ້ນອັນໜັກແໜ້ນ, ແລະ ນໍ້າໃຈເສຍສະຫຼະອັນສູງສົ່ງເພື່ອຊາດ ປະຊາຊົນ, ເປັນນັກຮັກຊາດທີ່ແທ້ຈິງ. ທ່ານເປັນນັກປຸກລະດົມຂົນຂວາຍ ແລະ ເຕົ້າໂຮມຄວາມສາມັກຄີປະຊາຊົນບັນດາເຜົ່າໃຫ້ເປັນປຶກແຜ່ນ ນອກນັ້ນ, ເພິ່ນຍັງເປັນນັກການເມືອງທີ່ເກັ່ງກ້າ, ສະຫຼາດສະຫຼຽວ ມີໄຫວພິບໃນການວາງຍຸດໂທບາຍດ້ານການຕໍ່ສູ້ການເມືອງ, ມີຄຸນສົມບັດສິນທໍາປະຕິວັດອັນຜ່ອງໃສ, ດໍາລົງຊີວິດແບບລຽບງ່າຍ, ທ່ານເປັນຄົນດຸໝັ່ນ, ມີນິດໄສຄ່ຽມຄົມ, ເປັນຄົນອອກແຮງງານເກັ່ງ ທາງດ້ານມັນສະໝອງ ແລະ ຮ່າງກາຍ, ເປັນນັກວິສະວະກອນທີ່ມີຄວາມຮູ້ຄວາມສາມາດສູງຄົນໜຶ່ງຂອງລາວ,ເປັນຜູ້ນໍາທີ່ແສນເຄົາລົບຮັກ ຂອງປະຊາຊົນລາວບັນດາເຜົ່າ ແລະ ປວງຊົນລາວທັງຊາດ.

      ທ່ານ ນາງຈັນສະໝອນ ທິບພະຫົງ ກໍາມະການປະຈໍາພັກແຂວງ. ຫົວໜ້າຄະນະໂຄສະນາອົບຮົມແຂວງ ໄດ້ເນັ້ນໃຫ້ສະມາຊິກພັກ, ພະນັກງານ-ລັດຖະກອນ ຄົນຮຸ່ນໃໝ່-ຮຸ່ນສືບທອດໄດ້ຄົ້ນຄ້ວາ, ຮໍ່າຮຽນເອົາເປັນແບບຢ່າງອັນດີງາມຂອງປະທານ ສຸພານຸວົງ ເພື່ອກ່າຍເປັນພະນັກງານຮຸ່ນສືບທອດ ທີ່ຈົ່ງຮັກພັກດີຕໍ່ພັກ ແລະ ຕໍ່ປະເທດຊາດ ພິີທີປາຖະກະຖາດັ່ງແມ່ນໃຊ້ເວລາ 1 ຕອນຈຶ່ງສໍາເລັດລົງ.

 

ມູນເຊື້ອຂອງຊາດ-ຂອງພັກ