ຄະນະໂຄສະນາອົບຮົມສຶກສາພັກແຂວງດຽນບຽນ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ

                       

          ໃນວັນທີ 6 ມິຖຸນາ 2019 ຜ່ານມາຄະນະໂຄສະນາອົບຮົມແຂວງອຸດົມໄຊ ໄດ້ຕ້ອນຮັບ ຄະນະຜູ້ແທນ ຄະນະໂຄສະນາສຶກສາພັກແຂວງດຽນບຽນ ສສ ຫວຽດນາມ ທີ່ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ ເຊິ່ງນໍາພາຄະນະອອກຕ້ອນຮັບໂດຍ ສະຫາຍ ບຸນຄົງ ຫຼ້າຈຽມພອນ ຄະນະປະຈໍາພັກແຂວງ, ປະທານກວດກາແຂວງ, ພ້ອມດ້ວຍຄະນະພັກ, ຄະນະໂຄສະນາອົບຮົມແຂວງ ແລະ ພະນັກງານພາຍໃນ ຄະນະໂຄສະນາອົບຮົມແຂວງ. ຄະນະຜູ້ແທນແຂວງດຽນບຽນນໍາໂດຍ ສະຫາຍ ຫງວຽນ ດິກ ເວຶ້ອງ ຄະນະປະຈໍາພັກແຂວງ, ຫົວໜ້າຄະນະໂຄສະນາສຶກສາພັກແຂວງດຽນບຽນ ສສ ຫວຽດນາມ.

            ໃນຕອນບ່າຍຂອງວັນດຽວກັນທັງສອງຝ່າຍ ໄດ້ຈັດພິທີພົບປະແລກປ່ຽນບົດຮຽນເຊິ່ງກັນ ແລະ ກັນ ກ່ຽວກັບວຽກງານໂຄສະນາອົບຮົມຂອງສອງແຂວງຂຶ້ນຢ່າງເປັນທາງການ ທີ່ຫ້ອງປະຊຸມຄະນະຈັດຕັ້ງແຂວງ ເຊິ່ງມີຜູ້ແທນສອງຝ່າຍເຂົ້າຮ່ວມ 18 ສະຫາຍ, ຍິງ 7 ສະຫາຍ. ກ່ອນອື່ນ ສະຫາຍ ບຸນຄົງ ຫຼ້າຈຽມພອນ ຄະນະປະຈໍາພັກແຂວງ, ປະທານກວດກາແຂວງ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ແຂວງອຸດົມໄຊຄັ້ງນີ້. ຈາກນັ້ນ ສະຫາຍ ຄໍາຈັນ ວ່າບົວແສງ ຮອງຫົວໜ້າຄະນະໂຄສະນາອົບຮົມແຂວງ ໄດ້ລາຍງານຈຸດພິເສດ, ສະພາບການເຄື່ອນໄຫວວຽກງານໂຄສະນາອົບຮົມໂດຍຫຍໍ້. ໂອກາດດັ່ງກ່າວນີ້ທັງສອງຝ່າຍໄດ້ມີການແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະແມ່ນພາລະບົດບາດ, ສິດ ແລະ ໜ້າທີ່ຂອງຄະນະໂຄສະນາອົບຮົມ ແລະ ຍັງໄດ້ແລກປ່ຽນບົດຮຽນໃນການເຄື່ອນໄຫວວຽກງານວິຊາສະເພາະອີກຫຼາຍບັນຫາ.

       ຕອນທ້າຍຂອງພິທີຍັງໄດ້ເຊັນບົດບັນທຶກຊ່ວຍຈໍາລະຫວ່າງ ຄະນະຜູ້ແທນ ຄະນະໂຄສະນາອົບຮົມແຂວງອຸດົມໄຊ, ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະຜູ້ແທນ ຄະນະໂຄສະນາສຶກສາພັກແຂວງດຽນບຽນ, ປະເທດສາທາລະນະລັດ ສັງຄົມນິຍົມຫວຽດນາມ ເພື່ອເປັນການເພີ່ມທະວີການພົວພັນຮ່ວມມືແບບພິເສດ ໃຫ້ເຂົ້້າສູ່ລວງເລິກ ໂດຍໄດ້ເອກະພາບກັນພັດປ່ຽນກັນເປັນເຈົ້າພາບ ຈັດພິທີພົບປະແລກປ່ຽນບົດຮຽນ ວຽກງານໂຄສະນາອົບຮົມ ຂອງສອງແຂວງອຸດົມໄຊ ແລະ ແຂວງດຽນສອງປີຕໍ່ 1 ຄັ້ງ.

 

ມູນເຊື້ອຂອງຊາດ-ຂອງພັກ